Skyweb.al
Prej 11 muajsh, 102 kontejnerë me mbetje të dyshuara të rrezikshme me burim furrat e kompanisë Kurum International qëndrojnë në Porto Romano.
Ngarkesa u nis nga porti i Durrësit në fillim të korrikut të vitit 2024 me destinacion Tajlandën, u bllokua në Singapor pas sinjalizimit të Rrjetit të Veprimit të Bazelit dhe më 28 tetor 2024 u rikthye në Shqipëri me anijen Moliva.
Që atë ditë, kontejnerët u sekuestruan dhe u zhvendosën në Porto Romano ku vazhdojnë të rrinë nën diell e shi, ndërsa dosja hetimore e Prokurorisë së Durrësit ka mbetur thuajse e pandryshuar.
As mostrat nuk janë marrë siç e kërkon ligji, me zinxhir të plotë prove, as nuk është përcaktuar shkencërisht se çfarë ka brenda secilit kontejner. Deri më tani kemi parë që nuk mungojnë faktet, madje ato janë me shumicë, por mungon vullneti!
Aktorët e dosjes janë të identifikueshëm. Kurum International si burim i mundshëm i pluhurit industrial të filtrave. Sokolaj shpk si eksportuese nga Durrësi. GS Minerals në Kroaci si marrës. Agjencitë shtetërore mjedisore dhe doganore që duhej të verifikonin ngarkesën dhe dokumentacionin shoqërues, sidomos kur destinacioni është një vend jo anëtar i OECD.
Operatori portual që administron terminalin lindor ku historikisht janë paketuar “big bags” me materiale të tilla. Dhe mbi të gjitha Prokuroria e Durrësit që ka pasur në dorë veprimet, terrenin, dhe kohën, por nuk ka kryer aktet bazike!
Pse?!
Skandali NUK është një çështje lokale që të shpresohet se mund të harrohet në Porto Romano nga ndonjë prokuror i korruptuar!
Shqipëria është palë e Konventës së Bazelit që rregullon lëvizjen ndërkufitare të mbetjeve të rrezikshme.
Eksporti te vendet pritëse kërkon miratim paraprak me shkrim nga vendet eksportuese, tranzit dhe importuese dhe garancinë se trajtimi do të bëhet sipas standardeve mjedisore e shëndetësore.
Në këtë rast, ngarkesa u kthye pikërisht sepse këto kushte nuk u plotësuan. U desh ndërhyrje e autoriteteve të Singaporit dhe Tajlandës për ta sjellë mbrapsht në Durrës. Pra nuk kemi vetëm një dyshim për mbetje të rrezikshme toksike, por kemi një skemë të plotë ndërkufitare me pasoja të qarta ligjore. Por, Prokuroria e Durrësit vijon të flejë mbi dosje.
Nëse pyetja është kush po e varros skandalin, përgjigjja fillon te mungesa e një akti shkencor.
Pa mostër, pa analizë, pa zinxhir prove, çështja nuk ecën para! Dhe për këtë duket se po kujdeset politika dhe drejtësia. Pa prova nuk ka akuzë. Pa laborator nuk ka fajtor.
Pikërisht për këtë arsye, SPAK duhet të marrë çështjen në dorë dhe të çojë para hetimet! Të dhënat paraprake përmbushin kushtet e dyshimit për një grup të strukturuar kriminal. /skyweb.al
