Autoriteti italian i Konkurrencës vendosi të mërkurën një gjobë prej 7 milionë eurosh ndaj njësisë italiane të Philip Morris, për shkak të pretendimeve se kompania ka përdorur marketing mashtrues për produktet e duhanit pa djegie, raporton Reuters.
Philip Morris Italia njoftoi se do ta ankimojë vendimin, të cilin e cilësoi si “të gabuar dhe me mangësi në disa nivele”.
“Shprehje dhe pretendime si ‘pa tym’, ‘produkte pa tym’ dhe ‘ndërtimi/planifikimi/përshpejtimi i një të ardhmeje pa tym’ (…) i mashtrojnë konsumatorët – përfshirë të miturit – duke i bërë të besojnë se këto produkte janë të padëmshme për shëndetin dhe/ose më pak të dëmshme se produktet e tjera të duhanit, veçanërisht cigaret tradicionale”, deklaroi autoriteti.
Sipas rregullatorit, i cili nisi hetimin në tetor të vitit 2025, provat e mbledhura tregojnë se njohuritë aktuale shkencore dhe klinike nuk mbështesin pretendimin se këto produkte janë më pak të dëmshme ose të padëmshme, veçanërisht për shkak të pranisë së nikotinës.
Nga ana tjetër, Philip Morris Italia argumentoi se termat e kundërshtuar nga autoriteti janë të saktë dhe “plotësisht në përputhje” me ligjin italian dhe direktivën përkatëse të Bashkimit Europian, e cila përdor termin “pa tym” për të përkufizuar produktet e duhanit që nuk përfshijnë procesin e djegies.
Kompania akuzoi autoritetin se po “kontribuon në krijimin e konfuzionit lidhur me produktet e duhanit dhe nikotinës, me një vendim që sugjeron se nuk ekziston asnjë dallim midis produkteve që tymosen dhe atyre pa djegie”. /skyweb.al
