Shtetet e Bashkuara po përgatiten të testojnë një shërbim të ri me pagesë shtesë për aplikantët e vizave turistike dhe të biznesit.
Sipas dokumenteve të siguruara nga Associated Press, Departamenti Amerikan i Shtetit pritet të nisë një program pilot që u mundëson aplikantëve të sigurojnë takim për intervistë brenda 10 ditësh.
Shërbimi do të jetë vullnetar dhe do të kushtojë 750 dollarë shtesë.
Kjo tarifë do t’i shtohet pagesës standarde prej 185 dollarësh për aplikimin e vizës, duke e çuar koston totale në 935 dollarë për ata që zgjedhin procedurën e përshpejtuar.
Programi pilot pritet të nisë më 1 korrik dhe të zgjasë deri më 31 dhjetor 2026.
Sipas planit, aplikantët që paguajnë tarifën shtesë do të kenë mundësi të rezervojnë intervistën brenda 10 ditësh nga momenti i pagesës, por vetëm në ambasadat dhe konsullatat amerikane që do të përfshihen në program.
Autoritetet amerikane kanë sqaruar se pagesa e shërbimit të përshpejtuar nuk garanton miratimin e vizës.
Nisma vjen në një kohë kur shumë aplikantë në vende të ndryshme përballen me pritje të gjata për të siguruar një takim në ambasadat amerikane.
Vonesat janë më të ndjeshme veçanërisht në vendet që nuk janë pjesë e Programit të Heqjes së Vizave.
Vitet e fundit, SHBA ka forcuar edhe procedurat e verifikimit për aplikantët, duke kërkuar në raste të caktuara informacione shtesë mbi historikun personal dhe aktivitetin në rrjetet sociale.
Departamenti i Shtetit pritet të publikojë listën e ambasadave dhe konsullatave ku do të ofrohet ky shërbim.
Nëse kërkesa rezulton e lartë, programi mund të zgjatet edhe pas përfundimit të fazës pilot.
