Kompania “Zvërnec South Adriatic Development” ka ndërprerë me efekt të menjëhershëm kontratën me shoqërinë private të sigurisë “Major Security”, pas incidentit të ndodhur gjatë protestës së banorëve në Zvërnec, ku një protestues u godit dhe u tërhoq zvarrë nga punonjës të sigurisë.
Ngjarja shkaktoi reagime të forta publike pas publikimit të pamjeve filmike, ku shihej ndërhyrja e dhunshme ndaj një qytetari që merrte pjesë në protestë. Pas incidentit, Policia arrestoi punonjësin e sigurisë Geraldo Biba, ndërsa procedoi Artur Gramin dhe Gazment Vathin. Ndërkohë, në kuadër të masave të marra pas ngjarjes, u pezullua edhe drejtori i Policisë së Vlorës.
Në një reagim publik, kompania ndërtuese deklaron se ka shqyrtuar me përgjegjësi të plotë materialet e bëra publike mbi sjelljen e shoqërisë së sigurisë dhe e konsideron të papranueshme vazhdimin e marrëdhënies kontraktuale me të.
Sipas kompanisë, për garantimin e sigurisë në zonën zhvillimore, të cilën ajo e cilëson si pronë private, ishte kontraktuar një kompani sigurie e pajisur me lejet dhe licencat përkatëse nga institucionet shtetërore dhe me përvojë në këtë fushë.
Megjithatë, “Zvërnec South Adriatic Development” thekson se kompania e sigurisë nuk ka pasur në asnjë moment udhëzime për të vepruar në kundërshtim me autorizimet ligjore apo në cenim të të drejtave të garantuara për qytetarët.
“Ndërhyrja ndaj një qytetari që ishte në të drejtën e tij të plotë për të protestuar jashtë kufirit të pronës, dhe tërheqja e tij brenda saj për të ushtruar forcë, nuk është vetëm e papranueshme moralisht, por edhe e dënueshme penalisht”, thuhet në reagimin e kompanisë.
Për këtë arsye, kompania njofton se ka ndërprerë menjëherë marrëdhënien kontraktuale me shoqërinë e sigurisë.
“Zvërnec South Adriatic Development” kërkon ndjesë për incidentin dhe u bën thirrje organeve kompetente të zhvillojnë një hetim të plotë dhe të paanshëm për ngjarjen, si dhe të ndëshkojnë sipas ligjit personat përgjegjës.
Kompania deklaron se qëndron në dispozicion të autoriteteve dhe palëve të tjera të interesuara, me gatishmëri dhe transparencë të plotë.
Në reagim, kompania thekson gjithashtu se marrëdhënia me komunitetin është thelbësore për investitorët dhe se në javët në vijim do të shtojë përpjekjet për një komunikim më të drejtpërdrejtë me banorët e zonës.
Nga ana tjetër, kompania shpreh keqardhje që, sipas saj, episodi i rëndë po përdoret për të shpërndarë në rrjetet sociale pamje të fabrikuara të projektit, me qëllim krijimin e perceptimit se zhvillimi do të dëmtojë natyrën.
“Zvërnec South Adriatic Development” pretendon se vlera ndërkombëtare e projektit qëndron pikërisht te përkushtimi për ta harmonizuar zhvillimin me natyrën, sipas standardeve të larta të mbrojtjes së ekosistemeve të veçanta të zonës.
Kompania njofton se projekti final do t’i prezantohet publikut në kohën e duhur, duke e cilësuar atë si një shembull të harmonisë mes zhvillimit dhe natyrës. /skyweb.al
