Një valë e re ndryshimesh pritet të ndodhë në tregun e pasurive të paluajtshme, teksa Ministria e Financave po përgatit hartimin e çmimeve të reja të referencës për pronat në të gjithë vendin. Këto çmime, që pritet të miratohen brenda muajit maj, synojnë të afrojnë më shumë vlerat fiskale me realitetin e tregut, pas një periudhe kur referencat aktuale, të miratuara në vitet 2022–2023, nuk kanë reflektuar plotësisht rritjen e çmimeve.
Ndërkohë, të dhënat nga Agjencia Shtetërore e Kadastrës tregojnë se procesi i rivlerësimit po ecën me ritme të shpejta. Deri tani janë rreth 9 mijë e 500 prona të përfshira, me pritshmërinë për të arritur në 10 mijë në ditët në vijim.
Pjesa më e madhe e kërkesave vjen nga Tirana me rreth 4 mijë prona, e ndjekur nga Durrësi me 2 mijë dhe Vlora me rreth 700.
Mungesa e përditësimit të referencave në përputhje me zhvillimet e fundit të tregut ka detyruar një pjesë të qytetarëve t’u drejtohen vlerësuesve privatë për të përafruar vlerën e pronës me çmimet reale të tregut, edhe pse kjo zgjedhje u kushton më shumë.
Ky trend është më i dukshëm në zonat urbane dhe turistike, ku diferencat mes çmimeve të referencës dhe atyre të tregut janë më të theksuara.
Në vite, fushatat e rivlerësimit kanë sjellë të ardhura deri në 180 milionë euro për buxhetin e shtetit.
Për vitin 2026, pritshmëritë mbeten të larta, sidomos me hyrjen në fuqi të çmimeve të reja, të cilat mund të rrisin bazën e taksimit dhe të formalizojnë më tej tregun imobiliar./Tv Klan
