Kur dëshira për të udhëtuar është më e madhe se buxheti, shumica e dashamirësve të natyrës përballen me të njëjtin realitet zhgënjyes, shkruan Marko Kopinke për “Travelbinger”.
Majat mahnitëse, pamjet “Instagram”-i dhe plazhet e virgjëra shpesh kërkojnë shpenzime që jo të gjithë udhëtarët mund t’i përballojnë. Por lajmi i mirë është se në botë ka ende vende të jashtëzakonshme, të përballueshme dhe me natyrë të paprekur, të cilat ofrojnë përvoja magjepsëse pa e rënduar xhepin.
Imagjinoni të zbuloni një natyrë të egër, ujëra kristal dhe vargmale të larta pa shpenzuar shumë. Këto destinacione të fshehura tregojnë se nuk ju duhet pasuria e një “trust fund” për të eksploruar mrekullitë më të bukura të planetit.
Nëse ëndërroni për ecje të nivelit botëror, plazhe të qeta dhe të paprishura, apo takime me botën e egër, këto vende ofrojnë bukuri maksimale natyrore me kosto minimale.
Shqipëria: Thesari i fshehur natyror i Evropës
Shqipëria mbetet një nga destinacionet më të lira në Evropë, me një vijë bregdetare të pacenuar, një kryeqytet me karakter të veçantë, qytete historike osmane dhe Alpe që të lënë pa frymë.
Vendi renditet ndër 25% e destinacioneve më të përballueshme në Evropë. Bregdeti shqiptar ofron plazhe të pastra, ujëra të kthjellta me nuanca bruz dhe gatime të freskëta deti – të shijshme dhe me çmime të ulëta. Shpesh, ekspertët e udhëtimeve e krahasojnë Shqipërinë me Kroacinë për bukurinë bregdetare, por pa çmimet e larta dhe turmat e turistëve.
Ndër plazhet më të rekomanduara janë Dhërmiu dhe Ksamili, të njohura për rërën e bardhë dhe ujin e tejdukshëm. Sipas të dhënave, turistët shpenzojnë mesatarisht rreth 44 euro në ditë gjatë një qëndrimi prej rreth 18 ditësh.
Për adhuruesit e ecjes, shtegu i famshëm Valbonë–Theth është një nga atraksionet kryesore, duke tërhequr qindra alpinistë çdo sezon. Përveç tij, Shqipëria ofron dhjetëra shtigje të tjera malore, kanione, liqene dhe zona rurale të gjelbra që e bëjnë vendin një parajsë për eksploruesit. Një avantazh i madh është edhe fakti se kampingu në natyrë është i ligjshëm kudo – çka e bën vendin ideal për ata që dëshirojnë të kursejnë në akomodim, duke fjetur në tenda apo furgonë kampimi.
Sipas “Travelbinger”, gjashtë destinacionet më të bukura dhe të përballueshme:
Shqipëria
Nepali
Indonezia
Laosi
Ruanda
Bullgaria
Nëse jeni gati për aventura natyrore të paharrueshme pa shpenzuar një pasuri, këto vende janë pikënisja ideale.
