Kryeministri Edi Rama deklaroi sot se qeveria nuk do të ketë asnjë ndryshim në përbërje pas pezullimit të zëvendëskryeministres Belinda Balluku nga GJKKO. Ai theksoi se aktualisht Shqipëria “nuk ka zv.kryeministre dhe as një ministre të Infrastrukturës dhe Energjisë që funksionon”, ndërsa shtoi se askush tjetër nuk do të emërohet në vend të saj.
Rama njoftoi se vendimi i GJKKO-së do t’i dërgohet Gjykatës Kushtetuese, duke e cilësuar ndërhyrje të papranueshme në pavarësinë e pushtetit ekzekutiv. Sipas tij, është Gjykata Kushtetuese ajo që duhet të përcaktojë nëse organet speciale kanë tejkaluar kompetencat e tyre.
Në deklaratën e tij, kryeministri theksoi se qeveria do ta respektojë vendimin e pezullimit, por paralajmëroi se nuk do të lejojë që ekzekutivi të “diktohet” nga veprime që ai i konsideroi si cenim të ndarjes së pushteteve.
Rama sqaroi se deri në marrjen e një vendimi nga Gjykata Kushtetuese, qeveria do të funksionojë pa një zëvendëskryeministër dhe pa një ministër të Infrastrukturës dhe Energjisë në detyrë, duke lënë kompetencat të mbuluara nga vetë ai.
Në përfundim, ai theksoi se ky proces do të trajtohet me përgjegjësi, ndërsa mbrojtja e pavarësisë së ekzekutivit mbetet prioritet i qeverisë. /skyweb.al
