Perimet me gjethe jeshile, peshku, bishtajoret dhe vaji i ullirit janë elementë thelbësorë në ushqyerjen e të moshuarve që duan të mbrojnë shëndetin e trurit dhe të ngadalësojnë rënien njohëse. Një studim i fundit i publikuar në revistën shkencore Neurology tregon se personat që ndiqnin dietën mesdhetare ose dietën MIND kishin më pak grumbullim të pllakave në tru – një nga shenjat kryesore të sëmundjes së Alzheimerit.
Rezultatet ishin veçanërisht domethënëse për ata që respektonin me përpikëri dietën mesdhetare: truri i tyre rezultoi deri në 18 vite “më i ri” krahasuar me individët që kishin ndjekur më pak këtë regjim ushqimor. Efekte të ngjashme, megjithëse disi më të moderuara, u vunë re edhe tek ndjekësit e dietës MIND.
Studimi afatgjatë
Shkencëtarët nga Rush University analizuan indet cerebrale të 581 pjesëmarrësve në një studim afatgjatë mbi kujtesën dhe plakjen, i nisur në vitet 1980. Pjesëmarrësit kishin pranuar të dhuronin trurin për kërkime pas vdekjes dhe plotësonin çdo vit pyetësorë të detajuar mbi zakonet e tyre ushqimore.
Nga analizat rezultoi se konsumimi i rregullt i perimeve me gjethe jeshile – të paktën shtatë racione në javë – lidhej me një “kursim” deri në 19 vite të plakjes së trurit, në krahasim me ata që konsumonin një racion ose më pak në javë.
Çfarë përfshijnë këto dieta?
Dieta tradicionale mesdhetare, e njohur për përfitimet në shëndetin kardiovaskular dhe uljen e rrezikut të goditjes në tru, përfshin sasi të mëdha peshku, vaj ulliri, fruta, perime, fasule, arra dhe drithëra të pasura me fibra.
Ndërsa dieta MIND – një ndërthurje e dietës mesdhetare me dietën DASH – i jep prioritet të veçantë zarzavateve me gjethe jeshile dhe manaferrave, të cilat lidhen me përmirësimin e funksioneve njohëse.
Të dyja dietat bazohen kryesisht në ushqime bimore të pasura me lëndë ushqyese dhe përbërës bioaktivë që ndihmojnë në uljen e inflamacionit dhe mbrojtjen e qelizave nga dëmtimet. Njëkohësisht, ato kufizojnë mishin e kuq, sheqernat dhe ushqimet e përpunuara.
Sipas studiuesve, këto rezultate theksojnë rëndësinë e një ushqyerjeje të shëndetshme si një faktor kyç në mbrojtjen e trurit dhe në uljen e rrezikut të demencës.
