Rritja e çmimeve të karburantit në Shqipëri po shtyn qytetarët të ndryshojnë mënyrën e lëvizjes, duke u orientuar masivisht drejt automjeteve elektrike.
Shqipëria vijon të renditet ndër vendet me karburantin më të shtrenjtë, një faktor që po ndikon drejtpërdrejt në tregun e makinave.
Sipas Drejtorisë së Përgjithshme të Shërbimeve të Transportit Rrugor, gjatë periudhës janar-mars 2026, 82 për qind e automjeteve të reja të regjistruara janë elektrike ose hibride plug-in, duke shënuar një rritje me 14 për qind krahasuar me të njëjtën periudhë të vitit 2025.
Rritja është edhe më e fortë për automjetet plotësisht elektrike. Në tremujorin e parë janë regjistruar 2,964 mjete “All-Electric”, ose 202 për qind më shumë se një vit më parë.
Këto përbëjnë mbi 51.5 për qind të totalit të mjeteve të regjistruara për herë të parë, një rritje me 68 për qind në raport me vitin e kaluar.
Ndërkohë, tregu i makinave të përdorura mbetet dominues në volum. Të dhënat zyrtare tregojnë se gjatë vitit 2026 janë importuar 84,204 automjete, të regjistruara për herë të parë në Shqipëri, ku mbi 21 mijë vijnë nga Koreja e Jugut. Pas saj renditen Gjermania, Italia dhe Kina. Vetëm në dy muajt e parë të vitit janë regjistruar 14,201 automjete.
Importi i lartë i mjeteve ka sjellë edhe të ardhura të konsiderueshme për buxhetin. Nga zhdoganimi i automjeteve të përdorura janë arkëtuar rreth 9.7 miliardë lekë, ose afro 97 milionë euro.
Zhvendosja drejt makinave elektrike po kthehet në një tendencë të qëndrueshme.
Për shumë qytetarë, kjo nuk është më një zgjedhje ekologjike, por një mënyrë për të shmangur kostot e larta të karburantit, që vijojnë të mbeten ndër më të lartat në rajon dhe më gjerë. /skyweb.al
