Kosova pritet të rikthejë pas më shumë se tri dekadash fabrikën e saj të prodhimit të municioneve, e cila do të ndërtohet në zonën industriale të Gjakovës. Projekti konsiderohet një hap strategjik që forcon sigurinë kombëtare dhe zgjeron kapacitetet mbrojtëse të ushtrisë së vendit.
Ish-ushtarakë dhe ekspertë të sigurisë e cilësojnë domethënëse ngritjen e fabrikës, veçanërisht në një periudhë kur situata e sigurisë në Ballkanin Perëndimor mbetet e brishtë. Sipas tyre, prodhimi vendas i municioneve u jep institucioneve të sigurisë aftësi më të mëdha operacionale dhe zvogëlon varësinë nga importet në kohë krizash.
Përtej dimensionit të sigurisë, projekti shihet edhe si një mundësi për zhvillim ekonomik. Prodhimi i municioneve pritet të krijojë vlerë të shtuar dhe të tërheqë investime të reja, ndërsa zinxhiri industrial që e shoqëron sjell efekte të drejtpërdrejta në tregun e punës.
Zyrtarët bëjnë të ditur se faza e parë do të fokusohet në përmbushjen e nevojave të brendshme të Forcës së Sigurisë së Kosovës, ndërsa më vonë prodhimi do të zgjerohet për eksport në tregje të tjera, duke e kthyer fabrikën në një burim të qëndrueshëm të ardhurash.
Rikthimi i kapaciteteve të prodhimit ushtarak vjen një vit pas marrëveshjes së Qeverisë së Kosovës me një prodhues turk të industrisë së mbrojtjes. Marrëveshja parashikon ndërtimin e fabrikës sipas standardeve të NATO-s dhe prodhimin e kalibrave të ndryshëm të municioneve dhe pajisjeve të tjera ushtarake.
