Enti Rregullator i Energjisë ka vendosur të mbajë në fuqi tarifat aktuale të shërbimit të shpërndarjes së energjisë elektrike deri në prill 2026, duke mos kryer asnjë ndryshim në strukturën tarifore për katër muajt e ardhshëm. Vendimi siguron stabilitet të kostove për konsumatorët familjarë dhe bizneset, në një periudhë ku sektorët energjetikë dhe prodhues janë veçanërisht të ndjeshëm ndaj luhatjeve tarifore.
Tarifat e shpërndarjes janë një komponent i rëndësishëm i çmimit përfundimtar të energjisë dhe aplikohen sipas nivelit të tensionit ku konsumatorët lidhen me rrjetin. Konsumatorët familjarë dhe bizneset e vogla në tension të ulët (0.4 kV) mbajnë një tarifë të ndryshme nga konsumatorët industrialë dhe bizneset e mëdha të lidhura në tensionet 6, 10, 20 dhe 35 kV.
Për bizneset që operojnë në tregun e lirë, tarifat e shpërndarjes përbëjnë një zë të konsiderueshëm të faturës mujore, pasi u shtohen çmimit të energjisë së blerë nga furnizuesit privatë dhe kostove të tjera rregullatore. Mbajtja e tarifave aktuale u jep atyre mundësinë të planifikojnë më saktë shpenzimet, duke shmangur rritje të menjëhershme të kostove, veçanërisht për sektorët prodhues dhe aktivitetet me konsum të lartë energjie.
Sipas tarifave ekzistuese, konsumatorët e lidhur në tensionin 35 kV paguajnë 1.55 lekë për kWh, ndërsa për ata të lidhur në tensionet 20, 10 dhe 6 kV aplikohet tarifa 3.99 lekë për kWh.
Tarifat e shpërndarjes financojnë operimin dhe mirëmbajtjen e rrjetit elektrik, investimet në infrastrukturë dhe garantimin e sigurisë së furnizimit, duke luajtur një rol thelbësor në funksionimin e gjithë sistemit energjetik.
