Shqipëria mund të kthehet në një pikë strategjike për furnizimin e Ballkanit Perëndimor dhe Europës Juglindore me gaz natyror të lëngshëm nga Shtetet e Bashkuara.
Kompania amerikane Argent LNG ka njoftuar nënshkrimin e një memorandumi mirëkuptimi me qeverinë shqiptare për të vlerësuar zhvillimin e një terminali të madh për magazinimin dhe rigazifikimin e LNG-së në bregdetin Adriatik.
Terminali i propozuar parashikohet të ketë një kapacitet deri në 5 milionë tonë në vit. Projekti nuk është konceptuar kryesisht vetëm për konsumin e Shqipërisë, por si një nyje rajonale që do të furnizonte vendet e Ballkanit dhe të Europës Juglindore.
Sipas Argent LNG, pozicioni gjeografik dhe lidhjet energjetike të Shqipërisë me gazsjellësin TAP, projektin IAP dhe korridorin Fier–Vlorë mundësojnë shpërndarjen e gazit amerikan në tregjet e rajonit.
Përmes marrëveshjeve të shkëmbimit dhe kthimit të drejtimit të rrjedhës, infrastruktura mund të përdoret në të ardhmen edhe për të mbështetur sigurinë energjetike të Ukrainës.
Argent LNG deklaron se marrëveshja me Shqipërinë lidhet me memorandumet e nënshkruara më parë me kompaninë turke BOTAŞ, ukrainasen Naftogaz dhe rumunen Transgaz. Synimi është krijimi i një arkitekture të përbashkët furnizimi rajonal, të mbështetur te LNG-ja amerikane dhe te reduktimi i varësisë nga gazi rus.
“Shqipëria ka mundësinë të shërbejë si një pikë e sigurt furnizimi, e mbështetur nga SHBA-ja, që forcon sigurinë energjetike të fqinjëve të saj dhe mbështet Ukrainën”, deklaroi Jonathan Bass, president dhe drejtor ekzekutiv i Argent LNG.
Kompania ka falënderuar ministrin Enea Karakaçi dhe qeverinë shqiptare për bashkëpunimin në këtë hap drejt forcimit të sigurisë energjetike transatlantike.
Megjithatë, memorandumi është jodetyrues dhe në këtë fazë palët kanë rënë dakord të studiojnë mundësinë e zhvillimit të terminalit. Pra, ende nuk bëhet fjalë për një vendim përfundimtar investimi apo për nisjen e punimeve.
Çfarë është Argent LNG?
Argent LNG është një kompani private amerikane që po zhvillon një terminal eksporti të gazit natyror të lëngshëm në Port Fourchon të Luizianës. Projekti amerikan synon një kapacitet deri në 25 milionë tonë LNG në vit, por është ende në fazën e zhvillimit dhe nuk është një impiant që aktualisht prodhon e eksporton gaz.
Kompania ka marrë nga Departamenti amerikan i Energjisë autorizim për eksport në vendet që kanë marrëveshje tregtie të lirë me SHBA-në, ndërsa autorizimi për tregjet e tjera mbetet një proces më vete. Shqipëria nuk ka një marrëveshje të tillë me SHBA-në, ndaj realizimi i furnizimit do të kërkonte edhe miratimet përkatëse amerikane. /skyweb.al
