Agjencia Kombëtare e Shoqërisë së Informacionit ka përfunduar procesin e dhënies së tenderit me vlerë 3.1 milionë euro pa TVSH për mirëmbajtjen e rrjetit qeveritar GOVNET, një nga sistemet më të rëndësishme të komunikimit institucional në vend, duke ia dhënë kontratën shoqërisë Infosoft Systems shpk.
Sipas dokumenteve të konsultuara nga Skyweb.al, kontratat janë firmosur tashmë dhe AKSHI ka bërë njoftimin publik për nënshkrimin e tyre, duke finalizuar një procedurë që ishte raportuar më herët nga skyweb.al që në janar 2026.
Ky tender zhvillohet në një periudhë kur AKSHI ndodhet në qendër të hetimeve të SPAK, pas zbërthimit të një skeme të dyshuar për fryrje kostosh dhe paracaktim fituesish në disa procedura prokurimi publik.
Nga të dhënat zyrtare të Qendrës Kombëtare të Biznesit rezulton se kompania Infosoft Systems shpk ka qenë historikisht në pronësi të Grigor Jotit, por gjatë vitit 2025 struktura e aksioneve ka ndryshuar përmes disa operacioneve, duke kaluar në kontrollin e Armand Sharës dhe Bledar Dhimës, të njohur ndryshe edhe si “çunat” e Jotit.
Aktualisht, Armand Shara zotëron aksione direkte në kompani, ndërsa pjesa tjetër kontrollohet përmes shoqërisë Tagg Engineering, duke e vendosur kontrollin faktik të Infosoft Systems te Shara dhe Dhima.
Të dhënat e prokurimeve publike tregojnë se Armand Shara rezulton përfitues i një vlere të konsiderueshme fondesh publike, kryesisht nga tenderët e AKSHI, përmes një rrjeti kompanish ku përfshihen Tag Engineering, ikubINFO, ikubINFO International, Infosoft Business Solutions dhe iNEXT, në disa raste në ortakëri edhe me Bledar Dhimën.
Siç konstaton Skyweb.al, në listën e subjekteve të regjistruara në Durana Tech Park rezulton edhe kompania iNEXT shpk, e regjistruar nga Armand Shara dhe Bledar Dhima, duke krijuar një lidhje të drejtpërdrejtë mes përfituesve të këtij tenderi dhe strukturës që është aktualisht nën hetim.
Durana Tech Park është përfshirë në hetimet e SPAK si një strukturë që dyshohet se është përdorur për skema shmangieje tatimore, të planifikuara të hynin në funksion nga janari 2026, por që janë ndërprerë pas nisjes së hetimeve penale.
EKSKLUZIVE / Skandali AKSHI, SPAK shtrin hetimet edhe te DURANA Tech Park
Në këtë mënyrë, tenderi prej mbi 3.1 milionë euro për mirëmbajtjen e rrjetit qeveritar GOVNET përfundon te një kompani që rezulton e lidhur me subjekte dhe individë që janë pjesë e hetimeve aktive të SPAK mbi skandalin e tenderëve të AKSHI dhe aktivitetet e dyshuara në Durana Tech Park, duke ngritur pikëpyetje mbi mënyrën e përzgjedhjes së fituesit dhe lidhjet e tij me një rrjet më të gjerë përfituesish fondesh publike.
