Arabia Saudite ka pezulluar përkohësisht funksionimin e tubacionit strategjik Lindje–Perëndim, pasi disa dronë të nisur nga territori i Irakut goditën infrastrukturën energjetike në zonat e Riadit dhe Medinës.
Sulmi shkaktoi dëme materiale dhe la disa persona të plagosur. Autoritetet saudite njoftuan se mbyllja e tubacionit u krye si masë paraprake, ndërsa ekipet teknike po vlerësojnë dëmet dhe sigurinë e tij. SPA
Tubacioni Lindje–Perëndim është një nga arteriet më të rëndësishme energjetike të Arabisë Saudite. Ai transporton naftën nga lindja e vendit drejt portit Yanbu në Detin e Kuq, duke shmangur Ngushticën e Hormuzit.
Përmes tij mund të kalojnë rreth 4–5 milionë fuçi naftë në ditë, një sasi e barasvlershme me afërsisht 4–5% të furnizimit botëror. Për këtë arsye, një ndërprerje e zgjatur mund të krijojë tronditje të reja në tregjet ndërkombëtare të energjisë.
Rijadi deklaroi se, të paktën për momentin, nuk do të ndërmarrë masa hakmarrëse ndaj Irakut, pas kërkesës së kryeministrit irakian që Bagdadit t’i lihet kohë për të marrë masa ndaj autorëve.
Iraku ka konfirmuar se dronët u nisën nga një zonë brenda provincës Maysan, pranë kufirit me Iranin. Komandanti i operacioneve në këtë provincë është shkarkuar dhe qeveria irakiane ka nisur hetim për zbardhjen e sulmit.
Arabia Saudite paralajmëroi se rezervon të drejtën të marrë çdo masë të nevojshme për mbrojtjen e sovranitetit, sigurisë kombëtare dhe infrastrukturës së saj strategjike.
Sulmi është cilësuar nga Këshilli i Bashkëpunimit të Gjirit si një “përshkallëzim i rrezikshëm” dhe kërcënim ndaj sigurisë dhe furnizimit energjetik në rajon.
