Një studim i ri ka treguar se viruset kryesorë që shkaktojnë kancer mund të zbulohen në ujërat e zeza, duke krijuar mundësi të reja për monitorimin e shëndetit publik dhe parandalimin e sëmundjeve. Studiues nga Baylor College of Medicine analizuan mostra të mbledhura nga shumë qytete të Teksasit gjatë viteve 2022–2025, duke përdorur një teknologji të avancuar gjenetike që identifikon mijëra viruse në të njëjtën kohë.
Në analiza u zbuluan të gjithë viruset kryesorë të lidhur me tumoret, përfshirë HPV-në, hepatitin B dhe C, virusin Epstein-Barr dhe disa polyomaviruse. Sipas studiuesve, këto infeksione shpesh qëndrojnë pa simptoma për vite me radhë, prandaj zbulimi i tyre herët është shumë i vështirë.
Studimi vuri re edhe një rritje të ndjeshme të disa viruseve pas vitit 2024, ndoshta për shkak të rikthimit të udhëtimeve dhe kontakteve sociale pas pandemisë Covid-19. Veçanërisht u monitorua HPV-ja, ku variantet HPV-16 dhe HPV-18, që lidhen me shumicën e rasteve të kancerit të qafës së mitrës, u gjetën shpesh në mostra.
Sipas autorëve, kjo metodë mund të përdoret në të ardhmen për të monitoruar përhapjen e viruseve, për të vlerësuar efektivitetin e vaksinave si Gardasil 9 dhe për të ndërtuar strategji më efektive për mbrojtjen e shëndetit publik. /skyweb.al
