Ministria e Infrastrukturës dhe Energjisë ka hedhur në zbatim një udhëzim të ri që riformaton të gjithë procesin e kualifikimit për drejtuesit profesionistë të mjeteve të rënda dhe transportit të pasagjerëve. Ndryshimet prekin drejtpërdrejt mënyrën e trajnimit, rinovimit të certifikatave dhe kontrollit mbi autoshkollat, me synimin për të përafruar sistemin shqiptar me kërkesat e Bashkimit Evropian dhe për të rritur standardet e sigurisë në rrugë.
Në qendër të udhëzimit është riorganizimi i plotë i orëve të formimit. Kandidatët që hyjnë për herë të parë në këtë kategori do të ndjekin një program teorik prej 60 orësh, i shpërndarë në të paktën 15 ditë, ndërsa pjesa praktike do të përfshijë 10 orë trajnimi, të realizuara në minimum 5 ditë. Ndërkohë, për drejtuesit që kërkojnë rinovimin e certifikatës, parashikohet një trajnim teorik prej 35 orësh, që duhet të përfundojë brenda një periudhe jo më të shkurtër se 7 ditë.
Një tjetër element kyç është integrimi i “Kodit 95” në lejen e drejtimit ose në certifikatën CAP, duke e bërë të detyrueshëm verifikimin e aftësive profesionale sipas standardeve evropiane për transportin e mallrave dhe udhëtarëve.
Programi i ri sjell për herë të parë në mënyrë të strukturuar njohuri mbi teknologjitë më të fundit të përdorura në sektor. Mes tyre përfshihet Smart Tachograph V2, që lidhet me përdorimin e tahografëve inteligjentë të gjeneratës së re. Po ashtu, drejtuesit do të trajnohen mbi sistemet ADAS, që përfshijnë frenimin automatik emergjent, asistencën për mbajtjen në korsi dhe sinjalizimet për rrezik përplasjeje.
Një peshë e veçantë i jepet edhe drejtimit ekonomik dhe mbrojtjes së mjedisit, përmes moduleve që synojnë reduktimin e konsumit të karburantit dhe emetimeve ndotëse.
Paralelisht, udhëzimi rrit ndjeshëm kontrollin institucional. Drejtoria e Përgjithshme e Shërbimeve të Transportit Rrugor do të ketë rol më të fortë mbikëqyrës, ndërsa autoshkollat do të duhet të certifikohen posaçërisht për ofrimin e kurseve CAP dhe të kalojnë kontrolle të detyrueshme çdo vit për infrastrukturën, mjetet dhe stafin. Çdo subjekt që nuk përmbush kriteret do të përjashtohet menjëherë nga sistemi.
Risia shtrihet edhe në aspektin social dhe shëndetësor të profesionit. Për herë të parë, një pjesë e programit, rreth 8 orë, i dedikohet menaxhimit të stresit, faktorëve psikologjikë, ndikimit të alkoolit, ushqyerjes dhe parandalimit të veprimtarive të paligjshme gjatë transportit.
Me skemën e re, rinovimi i certifikatës CAP lidhet drejtpërdrejt me përfundimin e detyrueshëm të trajnimit periodik prej 35 orësh. Për drejtuesit që disponojnë më shumë se një kategori, procesi i rinovimit mund të realizohet në një hap të vetëm. /skyweb.al
