Kryetari i Bashkisë së Tiranës, Erion Veliaj, kontraktoi kompaninë amerikane të PR, Hellerman Communications për të menaxhuar imazhin dhe perceptimin e tij në arenën ndërkombëtare, në një kohë kur përballjet me SPAK-un janë kthyer në kryefjalën e politikës shqiptare.
Dokumentet zyrtare të regjistruara në Departamentin e Drejtësisë në SHBA, sipas ligjit FARA, zbulojnë se Erion Veliaj dhe vëllai i tij, Arbër Veliaj, kanë ndërtuar një makinë të fuqishme ligjore dhe marrëdhëniesh publike midis Nju Jorkut dhe Uashingtonit.
Kjo mbrojtje strategjike mbështetet në dy nivele elitare, e cila nisi fillimisht më 1 mars 2025 me firmën Kasowitz Benson Torres LLP.
Si një nga studiot ligjore më agresive në Nju Jork, e njohur për përfaqësimin e figurave të larta politike në Amerikë, ajo u angazhua për të ofruar këshillim ligjor, mediatik dhe strategjik përballë hetimeve të prokurorisë së posaçme në Shqipëri.
Për të garantuar që zëri i tyre të dëgjohej më pas në mediat e huaja, në qershor të vitit 2025 avokatët futën në lojë agjencinë Hellerman Communications LLC. Dokumentat tregojnë se Hellerman nuk është kontraktuar drejtëpërdrejtë nga Veliaj apo vëllai i tij, por është pajtuar si nënkontraktor nga Kasowitz.
Sipas të dhënave zyrtare nga Departamenti i Drejtësisë, Kasoëitz e ka paguar 50 mijë dollarë agjencinë e PR për shërbimet që ajo ka kryer për llogari të zotit Veliaj. Sipas dokumentave kjo shumë është paguar nga Kasoëitz dhe është brenda pagesës që ajo ka faturuar nga Veliaj.
Shërbimi
Sipas dokumenteve zyrtare të deklaruara në Departamentin e Drejtësisë të SHBA-së, agjencia Hellerman Communications LLC ka ofruar shërbime të marrëdhënieve publike, komunikimit strategjik dhe menaxhimit të perceptimit publik për llogari të Erion Veliajt.
Konkretisht, shërbimet dhe aktivitetet e kryera prej saj përfshijnë:
• Shpërndarjen e deklaratave dhe raporteve: Agjencia ka asistuar në publikimin dhe shpërndarjen e komunatave për shtyp, deklaratave publike dhe raporteve të cilat përgatiteshin nga ekipi i avokatëve të studios ligjore Kasoëitz posaçërisht për Erion Veliajn.
• Menaxhimin e medias ndërkombëtare: Si një kompani e specializuar në Litigation PR (PR gjatë proceseve gjyqësore), ajo ka shërbyer si urë lidhëse për të koordinuar mesazhet dhe mbrojtjen e klientit me mediat e huaja, me qëllim që strategjia ligjore e avokatëve të pasqyrohej në publik.
• Komunikime të mundshme me institucionet e SHBA: Dokumentet specifikojnë se shërbimet e ofruara mund të përfshinin potencialisht edhe komunikime në emër të klientit me Departamentin e Shtetit të SHBA-së dhe agjenci të tjera të Degës Ekzekutive të qeverisë amerikane, si dhe marrëdhënie publike që lidhen me shtetin e së drejtës dhe qeverisjen në Shqipëri.
Agjencia Hellerman drejtohet nga John Hellerman, i cili njihet si një ekspert i madh i menaxhimit të krizave publike në Uashington, dhe u mandatua zyrtarisht nga ekipi i avokatëve për të vënë në lëvizje rrjetin e tij të ndikimit me qëllim shpërndarjen e raporteve dhe deklaratave mbrojtëse për klientin.
Hellerman ka menaxhuar disa nga fushatat më të rëndësishme të PR në Shtetet e Bashkuara të Amerikës, nga kriza e Enronit deri tek konflikti i azbestit dhe lufta e patentave mes gjigandëve të teknologjisë. /kapitali.al
