Presidentja e Komisionit Evropian, Ursula von der Leyen, njoftoi nga Brukseli se aplikacioni evropian për verifikimin e moshës, i testuar në pesë shtete anëtare përfshirë Italia, është tashmë teknikisht gati dhe pritet të vihet së shpejti në dispozicion të qytetarëve.
Ky aplikacion do t’u mundësojë përdoruesve të konfirmojnë moshën e tyre gjatë aksesit në platformat online, duke synuar rritjen e sigurisë në internet, veçanërisht për fëmijët.
“Ata që duhet t’i rrisin fëmijët janë prindërit, jo platformat”, theksoi Von der Leyen gjatë konferencës.
Ajo kujtoi angazhimin e saj për ta bërë botën digjitale më të sigurt për të miturit, duke theksuar se, megjithëse teknologjia ofron mundësi të mëdha, ajo sjell edhe rreziqe serioze për sigurinë e tyre online.
Sipas saj, aplikacioni është i thjeshtë në përdorim: shkarkohet, konfigurohet përmes pasaportës ose kartës së identitetit dhe më pas përdoret për të verifikuar moshën gjatë hyrjes në shërbime digjitale.
Von der Leyen nënvizoi gjithashtu se aplikacioni respekton standardet më të larta të privatësisë, duke lejuar verifikimin e moshës pa zbuluar të dhëna të tjera personale. Ai është plotësisht anonim dhe nuk lejon gjurmimin e përdoruesve.
Aplikacioni funksionon në të gjitha pajisjet – telefona, tableta dhe kompjuterë – dhe është me kod të hapur, çka e bën të përdorshëm edhe për vendet partnere.
“Platformat online mund të mbështeten lehtësisht në këtë zgjidhje. Nuk ka më justifikime. Evropa ofron një mjet falas dhe të thjeshtë që ndihmon në mbrojtjen e fëmijëve nga përmbajtjet e dëmshme dhe të paligjshme”, përfundoi ajo.
