Një qasje e re terapeutike kundër HIV-it pritet të lehtësojë ndjeshëm trajtimin për mijëra pacientë në mbarë botën.
Sipas të dhënave të një studimi klinik të fazës së tretë, të publikuara në revistën prestigjioze The Lancet, një tabletë e vetme ditore që përmban dy barna antiretrovirale ka dëshmuar efikasitet dhe siguri të lartë.
Në studim morën pjesë mbi 550 persona që jetojnë me HIV, nga rreth 15 vende të ndryshme. Shumica prej tyre më parë ndiqnin regjime trajtimi që përfshinin nga 2 deri në 11 pilula në ditë.
Pas kalimit në terapinë e re me një pilulë të vetme, rreth 96% e pjesëmarrësve arritën të mbajnë ngarkesën virale në nivele të pazbulueshme, një tregues thelbësor për kontrollin e infeksionit dhe për reduktimin e rrezikut të transmetimit.
Ekspertët nënvizojnë se thjeshtimi i regjimit të trajtimit mund të rrisë ndjeshëm përkushtimin e pacientëve ndaj terapisë, duke zvogëluar ndërprerjet dhe mundësinë e zhvillimit të rezistencës ndaj barnave. Terapia e re u tolerua mirë dhe nuk u raportuan efekte anësore serioze të lidhura drejtpërdrejt me kombinimin.
Në rast se merr miratimin nga autoritetet përkatëse rregullatore, kjo pilulë mund të shënojë një përparim të rëndësishëm në menaxhimin afatgjatë të HIV-it, duke ofruar një zgjidhje më të thjeshtë, praktike dhe potencialisht më të përballueshme për pacientët. /skyweb.al
