Një prej zyrtarëve të AKSHI-t, Emirton Suli, ka zbardhur para Prokurorisë së Posaçme mekanizmin se si, sipas tij, paracaktoheshin tenderat në këtë institucion, duke theksuar se kriteret vendoseshin paraprakisht dhe fituesit orientoheshin që në fillim të procedurave.
Në dëshminë e tij, Suli shpjegon se Daniel Shima kishte krijuar një adresë emaili projekte@akshi.goc.al, nga e cila u dërgoheshin anëtarëve të grupeve të punës dokumentet e gatshme për projektet e prokurimit publik.
Sipas tij, kjo ishte bërë qëllimisht për të fshehur burimin real të përgatitjes së dokumenteve dhe për të mos identifikuar subjektin që qëndronte pas tyre.
Në një nga procedurat konkrete, dëshmitari deklaron se ishte e qartë që tenderi ishte ndërtuar për të favorizuar shoqërinë “Image & Communication Development” sh.p.k., me zotërues Igli Gjelishti. Për të përjashtuar kompanitë e tjera nga gara, Suli tregon se Daniel Shima, në kohën kur ishte zv.drejtor i përgjithshëm, kishte futur si kriter të veçantë pajisjen me certifikatën CSP, e lëshuar nga AKSIK.
Sipas tij, vendosja e këtij kriteri bllokoi një numër të madh procedurash. Suli akuzon gjithashtu Daniel Shimën për bashkëpunim me Gerond Meçen dhe Ermal Beqirin. “Ky kriter nuk u hoq, pasi të gjithë operatorët ekonomikë kishin marrëdhënie të mira me AKSHI dhe e dispononin këtë certifikatë”, deklaron ai.
Megjithatë, pas largimit të Shimës nga detyra, sipas dëshmisë, shoqërisë ABS të Gerond Meçes nuk iu rinovua certifikata, duke krijuar një artificë ligjore për ta mbajtur jashtë procedurave të prokurimit. Po sipas hetimeve të SPAK, Gerond Meçe është rrëmbyer dhe detyruar të tërhiqte ankesat pranë KPP për tenderat.
I pyetur për procedurën “Implementimi i laboratorëve SMART”, Suli tregon se në cilësinë e kryetarit të njësisë së prokurimit kishte konstatuar se fituesi ishte paracaktuar, konkretisht shoqëria Albascan. Ai thekson se paracaktimi ishte bërë nga Gerond Meçe dhe Daniel Shima, ndërsa dokumentet e kritereve i kishin ardhur të gatshme nga një person me inicialet A.M., madje edhe me zarfe që mbërrinin në zyrë me pseudonimin “Zarf për Albanin”.
Më tej, dëshmitari shpjegon se i gjithë sistemi i prokurimeve në AKSHI ishte i koordinuar nga Daniel Shima, nga i cili vinin si dokumentet standarde, ashtu edhe ftesat për operatorët ekonomikë. Suli shton se kishte dyshime se këto dokumente përgatiteshin nga vetë subjektet private dhe më pas u jepeshin anëtarëve të grupeve të punës për firmosje.
“Asnjë projekt nuk ndryshohej nga ato që sillte Shima, por miratoheshin ashtu sikurse silleshin”, deklaron ai.
Gjithashtu, Suli thekson se në 99% të rasteve, emrat e operatorëve ekonomikë që ftoheshin për ofertë jepeshin nga Daniel Shima, ndërsa përgjigjet vinin bashkë në një zarf të vetëm, duke ngritur dyshime se ato hartoheshin nga një operator i vetëm dhe paraqiteshin si oferta të ndryshme për të krijuar një garë fiktive dhe për të justifikuar fitues të paracaktuar.
Dëshmitari shton se procedurat sekrete, për shkak se nuk publikoheshin, ishin më të lehta për t’u manipuluar.
Ndërkohë, në një dëshmi të vetë Daniel Shimës në SPAK, publikuar më herët, ai ka deklaruar se paracaktimet bëheshin me porosi të ish-drejtoreshës së AKSHI-t, Mirlinda Karçanaj, e cila aktualisht është marrë e pandehur dhe ndodhet në arrest shtëpie.
Këto dëshmi pritet të jenë kyçe për hetimet mbi një nga çështjet më të ndjeshme të prokurimeve publike në vend, ku dyshohet për një skemë të mirëorganizuar për orientimin dhe kontrollin e tenderave. /skyweb.al
