Shqipëria po forcon pozicionin e saj si një destinacion turistik në rritje, duke prezantuar një portofol ambicioz me 83 projekte strategjike të fokusuara në turizëm, infrastrukturë dhe tërheqjen e investimeve të huaja, shkruan revista greke “Tornos News”.
Ky portofol u prezantua në kuadër të panairit ndërkombëtar të pasurive të paluajtshme MIPIM në Kanë, një nga ngjarjet më të rëndësishme globale për investitorët dhe zhvilluesit.
MIPIM (Le Marché International des Professionnels de l’Immobilier) është panairi më i madh në botë për pasuritë e paluajtshme, investimet dhe planifikimin urban, i cili zhvillohet çdo vit në muajin mars, në Pallatin e Festivaleve, në Kanë, Francë.
Ky event 4-ditor mbledh mbi 20,000 profesionistë të nivelit të lartë nga industria, investitorë, drejtues qytetesh dhe zhvillues, me qëllim formësimin e projekteve urbane të së ardhmes, nxitjen e partneriteteve dhe prezantimin e zhvillimeve të qëndrueshme dhe inovative.
Projektet shqiptare përfshijnë një gamë të gjerë zhvillimesh, nga resorte turistike dhe marina moderne, deri te hapësira multifunksionale biznesi dhe rezidenca luksoze.
Zonat më të përfshira janë Tirana, Vlora dhe Saranda, ku interesi i investitorëve tashmë është i lartë dhe ka sjellë një rritje të shpejtë të çmimeve të pasurive të paluajtshme, si dhe një kërkesë në rritje për prona cilësore dhe struktura moderne turistike.
Këto zhvillime konfirmojnë strategjinë e Shqipërisë për ta kthyer turizmin në një motor kryesor të ekonomisë, duke investuar në projekte që përmirësojnë përvojën e vizitorëve dhe rrisin standardet e shërbimeve.
Ndërkohë, disa projekte madhore infrastrukturore vijojnë të përballen me sfida.
Një prej tyre është porti i ri tregtar në Porto Romano, një investim me vlerë rreth 393 milionë euro, i cili ka hasur vonesa pas tërheqjes së kompanisë së vetme në garë për ndërtimin.
Autoritetet shqiptare kanë bërë të ditur se po punojnë për një plan alternativ për realizimin e projektit.
Megjithatë, zhvillimet pozitive në sektorin e turizmit mbeten të forta.
Projekti i marinës për jahte në të njëjtën zonë po vijon sipas planit, duke forcuar më tej ofertën turistike dhe duke e pozicionuar Shqipërinë si një destinacion gjithnjë e më tërheqës në Mesdhe.
Me një kombinim të investimeve strategjike, natyrës së pasur dhe interesit në rritje nga tregjet ndërkombëtare, Shqipëria po konsolidohet si një nga vendet më premtuese për turizmin në rajon.
