Arrestimi i biznesmenit shqiptar Ermal Beqiri në Francë vijon të marrë vëmendjen e mediave vendase, jo vetëm për shkak të urdhër-kërkimit ndërkombëtar ndaj tij, por edhe për zonën mbi të cilën fluturoi pa autorizim.
Sipas medias publike franceze ICI, 44-vjeçari është dënuar me 7 mijë euro gjobë nga Prokuroria e Amiens, pasi kaloi në mënyrë të paligjshme mbi centralin bërthamor të Penly, në Seine-Maritime.
Beqiri u arrestua në aeroportin e Albert, ndërsa autoritetet shqiptare konfirmuan për AFP-në se ai ishte në kërkim ndërkombëtar.
Vëmendje të veçantë në raportimet franceze ka marrë rëndësia strategjike e centralit të Penly.
Ky central është zgjedhur nga shteti francez dhe kompania EDF si vendi ku do të ndërtohen dy reaktorët e parë EPR2.
Ata janë pjesë e programit kombëtar për ngritjen e gjashtë reaktorëve të rinj bërthamorë në Penly, Gravelines dhe Bugey.
Projekti konsiderohet një nga investimet më të rëndësishme strategjike të Francës dhe synon vënien në funksion të reaktorit të parë rreth vitit 2038.
Në Penly kanë nisur tashmë punimet përgatitore, investimet infrastrukturore dhe organizimi i kantierit.
Sipas EDF-së, projekti pritet të kthehet në një nga kantieret industriale më të mëdha në Europë dhe të ketë rol kyç në sigurinë energjetike të Francës.
Pikërisht statusi i veçantë i zonës shpjegon reagimin e menjëhershëm të autoriteteve franceze ndaj fluturimit të paautorizuar. Rasti u raportua fillimisht nga Le Journal du Dimanche, ndërsa ICI konfirmoi më pas dënimin me gjobë dhe arrestimin e Beqirit.
