Pas variantit të Partisë Socialiste për 46 bashki, Partia Demokratike ka hartuar propozimin e saj për reformën territoriale, me 100 bashki të organizuara në 6 rajone.
Drafti u është shpërndarë deputetëve demokratë nga bashkëkryetari i Komisionit të Posaçëm, Luciano Boçi.
Sipas mesazhit të tij, lista është përgatitur nga ekspertët e PD-së dhe është përcjellë me miratimin e kryetarit të partisë dhe të grupit parlamentar. Varianti demokrat parashikon bashkimin e qarqeve aktuale në gjashtë rajone më të mëdha.
Rajoni Shkodër–Lezhë do të përmbajë 16 bashki, ndërsa Dibër–Kukës 13 bashki.
Rajoni Tiranë–Durrës parashikohet të ketë 15 bashki.
Elbasan–Korçë dhe Fier–Berat do të kenë nga 19 bashki secili, ndërsa Vlorë–Gjirokastër 18 bashki.
Propozimi rikthen në hartën administrative disa bashki që u hoqën pas reformës së vitit 2014.
Në qarkun e Tiranës numri i bashkive propozohet të rritet nga 5 në 10. Në Shkodër parashikohen 8 bashki, nga 5 aktualisht, ndërsa në Lezhë numri rritet nga 3 në 8.
Mes njësive të propozuara janë Velipoja, Drivasti, Kopliku, Shishtaveci, Bicaj, Maqellara, Shupenza, Kastrioti dhe Lura.
Në hartë rikthehen gjithashtu Petrela, Kashari, Dajti, Arbana, Ndroqi, Amantia, Orikumi, Ksamili dhe Novosela.
Dy partitë paraqesin modele të kundërta për organizimin vendor. PS kërkon reduktimin e numrit të bashkive nga 61 në 46, ndërsa PD propozon zgjerimin e tyre në 100 dhe krijimin e 6 rajoneve. /skyweb.al
