Një zjarr i rënë në një magazinë në zonën e Shkozetit ka shkaktuar ndërprerje të energjisë elektrike në një pjesë të Durrësit.
Ministri i Infrastrukturës dhe Energjisë, Enea Karakaçi, bëri të ditur se incidenti ndodhi rreth orës 15:40.
Si pasojë e flakëve, u stakuan linjat 110 kV që furnizojnë nënstacionin e Shkozetit. Situata vijon të mbetet e vështirë, ndërsa zjarrfikësit po punojnë për shuarjen e plotë të zjarrit.
Për arsye sigurie, njëra prej linjave 110 kV mbahet ende jashtë funksionit.
Brigadat e Operatorit të Sistemit të Transmetimit ndodhen në terren dhe do të nisin riparimet sapo të krijohen kushtet për ndërhyrje të sigurt. Ndërkohë, OSSH ka kaluar një pjesë të furnizimit në linja alternative.
Kjo ka mundësuar rikthimin e energjisë në disa zona të qytetit.
Megjithatë, zgjidhja konsiderohet e përkohshme, pasi rrjeti mbetet i ngarkuar dhe furnizimi përmes unazimeve nuk mund të vazhdojë gjatë.
Ministria u bëri thirrje qytetarëve për mirëkuptim dhe njoftoi se ekipet e OST dhe OSSH janë në gatishmëri për rikthimin e plotë të furnizimit. /skyweb.al
