Dogana shqiptare ka njoftuar sot se udhëtarët që hyjnë në territorin e vendit mund të sjellin me vete mallra për përdorim vetjak ose si dhurata, pa paguar detyrime doganore, nëse respektojnë kufijtë e përcaktuar në legjislacionin doganor.
Sipas rregullave në fuqi, vlera maksimale e mallrave që përfitojnë nga përjashtimi është:
- 300 euro për udhëtarët që vijnë me rrugë tokësore
- 430 euro për ata që hyjnë me rrugë ajrore ose detare
- 150 euro për udhëtarët nën 15 vjeç
Përveç produkteve të zakonshme për konsum personal, lejohen edhe sasi të kufizuara duhani dhe pijesh alkoolike:
- Deri në 200 cigare, ose 100 cigarillo, ose 50 puro, ose 250 gramë duhan
- Një litër pije me përmbajtje alkooli mbi 22% ose dy litra pije me përmbajtje nën 22%
- Dy litra verë pa gaz dhe deri në 10 litra birrë
- Deri në tre kilogramë kafe për përdorim personal
Dogana sqaron se udhëtarët nën 17 vjeç nuk përfitojnë nga përjashtimet që lidhen me alkoolin dhe duhanin.
Në rast se mallrat tejkalojnë kufirin e lejuar, ato duhet të deklarohen pranë autoriteteve doganore. Për mallrat pa karakter tregtar zbatohet një procedurë e thjeshtuar deklarimi.
Autoritetet doganore theksojnë se kanë të drejtë të kontrollojnë bagazhet në çdo moment për të verifikuar përputhshmërinë me ligjin dhe për të parandaluar futjen e paligjshme të mallrave në Shqipëri. Masat synojnë lehtësimin e qarkullimit të udhëtarëve që respektojnë rregullat dhe administrimin e drejtë të kufijve. /skyweb.al
