Sektori i ndërtimit ka regjistruar rritjen më të lartë të pagës mesatare në Shqipëri gjatë tremujorit të parë të vitit 2026.
Sipas të dhënave të INSTAT, paga mesatare mujore bruto në vend arriti në 90,119 lekë, duke u rritur me 9.6% krahasuar me të njëjtën periudhë të vitit të kaluar.
Por rritja më e fortë është shënuar në aktivitetin ekonomik “Ndërtim”.
Në këtë sektor, paga mesatare është rritur me 22.2% krahasuar me tremujorin e parë të vitit 2025.
INSTAT nuk jep në këtë publikim vlerën konkrete të pagës mesatare për ndërtimin, por thekson se ky aktivitet ka pasur rritjen më të madhe mes sektorëve të ekonomisë.
Në krahun tjetër, rritja më e ulët është regjistruar në aktivitetet “Arte, argëtim dhe çlodhje, si dhe aktivitete të tjera shërbimi”, ku paga mesatare u rrit me 5.5%.
Të dhënat tregojnë se rritja e pagave në ndërtim ka qenë më shumë se dyfishi i rritjes mesatare kombëtare.
Ndërkohë, pagat më të larta në vend vijojnë të jenë në aktivitetet financiare dhe të sigurimit, me 157,434 lekë në muaj.
Pas tyre renditet sektori i informacionit dhe komunikacionit, me 131,747 lekë në muaj.
Sipas INSTAT, të dhënat për pagat bazohen në informacionet administrative të Drejtorisë së Përgjithshme të Tatimeve për kontribuesit në sigurimet shoqërore.
