Aktivitetet financiare, sigurimet dhe sektori i teknologjisë mbeten kategoritë me pagat më të larta në Shqipëri.
Sipas të dhënave të INSTAT për tremujorin e parë të vitit 2026, paga mesatare mujore bruto në vend arriti në 90,119 lekë.
Por disa sektorë rezultojnë ndjeshëm mbi këtë mesatare.
Në krye renditen aktivitetet financiare dhe të sigurimit, ku paga mesatare mujore bruto është 157,434 lekë.
Pas tyre vjen sektori i informacionit dhe komunikacionit, me pagë mesatare 131,747 lekë.
Këto janë dy aktivitetet ekonomike që paguajnë më shumë se mesatarja kombëtare.
Edhe ndarja sipas profesioneve tregon diferenca të mëdha.
Menaxherët, ligjvënësit dhe drejtorët ekzekutivë kanë pagën më të lartë mesatare, me 136,213 lekë në muaj.
Mbi mesataren kombëtare janë edhe specialistët me arsim të lartë, me pagë mesatare 116,074 lekë.
Ndërkohë, rritja më e madhe e pagës mesatare nuk është regjistruar në sektorët më të paguar, por në ndërtim.
Sipas INSTAT, paga mesatare në ndërtim është rritur me 22.2% krahasuar me një vit më parë.
Në ndarjen sipas profesioneve, rritja më e fortë është shënuar te zejtarët, artizanët dhe profesionet e lidhura me to, me 15.7%, të ndjekur nga punëtorët në profesionet elementare, me 15.3%.
Të dhënat tregojnë se tregu i punës vijon të ketë diferenca të mëdha mes sektorëve tradicionalë dhe atyre që lidhen me financat, sigurimet, teknologjinë dhe pozicionet drejtuese.
