Paga mesatare mujore bruto në Shqipëri ka kaluar nivelin e 90 mijë lekëve.
Sipas të dhënave të publikuara nga INSTAT për tremujorin e parë të vitit 2026, paga mesatare mujore bruto arriti në 90,119 lekë.
Krahasuar me të njëjtën periudhë të vitit 2025, paga mesatare është rritur me 9.6%.
Të dhënat tregojnë se sektorët me pagat më të larta mbeten aktivitetet financiare dhe të sigurimit, ku paga mesatare është 157,434 lekë.
Pas tyre renditet sektori i informacionit dhe komunikacionit, me pagë mesatare 131,747 lekë.
Rritja më e lartë e pagës mesatare është shënuar në sektorin e ndërtimit, me 22.2%.
Ndërsa rritja më e ulët është regjistruar në aktivitetet e artit, argëtimit, çlodhjes dhe shërbimeve të tjera, me 5.5%.
Sipas grup-profesioneve, pagat më të larta i kanë menaxherët, ligjvënësit dhe drejtorët ekzekutivë, me pagë mesatare 136,213 lekë.
Mbi mesataren kombëtare janë edhe specialistët me arsim të lartë, me pagë mesatare 116,074 lekë.
INSTAT evidenton gjithashtu se në tremujorin e parë të vitit 2026 është rritur numri i punonjësve me pagë minimale.
Kjo lidhet me rritjen e pagës minimale nga 40 mijë lekë në 50 mijë lekë, e cila hyri në fuqi më 1 janar 2026.
Të dhënat për pagat bazohen në informacionet administrative të Drejtorisë së Përgjithshme të Tatimeve për kontribuesit në sigurimet shoqërore. /skyweb.al
