Ekspozimi ndaj diellit nuk varet vetëm nga mungesa e kremit mbrojtës. Ka edhe faktorë të përditshëm, shpesh të pavënë re, që mund ta bëjnë lëkurën më të ndjeshme dhe më të rrezikuar ndaj dëmtimeve nga rrezet UV.
Një ndër ta janë produktet për kujdesin e lëkurës. Disa kremra kundër plakjes dhe trajtime për aknet dobësojnë barrierën mbrojtëse të lëkurës, duke e bërë atë më të ndjeshme ndaj diellit. Përbërës si retinoli, vitamina A, acidi glikolik, acidi salicilik dhe hidrokinoni njihen për rritjen e fotosensibilitetit.
Edhe ilaçet mund të ndikojnë në këtë proces. Disa trajtime për aknet, antibiotikë, medikamente kundër depresionit dhe anti-inflamatorë mund të shtojnë rrezikun e djegieve nga dielli.
Roli i ushqimit gjithashtu nuk duhet nënvlerësuar. Mungesa e vitaminës B3 mund ta bëjë lëkurën më të ndjeshme ndaj rrezeve UV. Ndërkohë, ushqime si selinoja, majdanozi dhe disa agrume mund të shkaktojnë reagime në lëkurë pas ekspozimit në diell.
Një gabim i zakonshëm është mos përdorimi i mbrojtjes në ditët me re. Edhe kur temperaturat janë të ulëta apo moti duket i freskët, një pjesë e madhe e rrezeve UV depërton përmes reve dhe vazhdon të dëmtojë lëkurën.
Për këtë arsye, mbrojtja nga dielli duhet të jetë pjesë e rutinës së përditshme. Përdorimi i kremit me SPF, shmangia e ekspozimit në orët e pikut dhe kujdesi ndaj produkteve apo ilaçeve që përdoren janë hapa të thjeshtë, por të rëndësishëm për shëndetin e lëkurës./skyweb.al
