Kreu i Prokurorisë së Posaçme Altin Dumani prezantoi sot në Këshillin e Lartë të Prokurorisë raportin vjetor për punën e institucionit që ai drejton gjatë vitit 2024. Gjatë fjalës së tij, Dumani theksoi suksesin në goditjen e pasurive me origjinë të dyshimtë, duke deklaruar se janë sekuestruar pasuri me një vlerë prej 27 milionë eurosh dhe janë konfiskuar pasuri në vlerën 36 milionë euro.
Ai shtoi se është vërejtur një rritje e ndjeshme e procedimeve penale për veprën penale të pastrimit të parave, me një rritje prej 34% krahasuar me vitin 2023 dhe trefishim në raport me vitin 2021.
Kritika për Policinë e Shtetit: Më pak kallëzime, qytetarët më aktivë se uniformat blu
Altin Dumani shprehu shqetësimin për uljen e bashkëpunimit nga ana e Policisë së Shtetit në raport me kallëzimet për krimin e organizuar dhe korrupsionin. Sipas tij, në vitin 2024 janë referuar vetëm 30 çështje nga Policia, krahasuar me 65 në vitin 2023, duke shënuar një rënie të ndjeshme.
Në kontrast, kreu i SPAK vuri në dukje një rritje të ndjeshme të kallëzimeve nga qytetarët dhe institucionet, duke e cilësuar këtë si një dëshmi të rritjes së besimit të publikut tek SPAK. Gjatë vitit 2024, janë regjistruar 327 procedime të reja dhe janë përfunduar 2018 çështje, një rritje prej 18% krahasuar me vitin e kaluar.
33 ish-zyrtarë të lartë nën hetim, 10 me vendim të formës së prerë
Në fokus të raportimit ishin edhe hetimet ndaj zyrtarëve të lartë. Dumani bëri me dije se gjatë vitit 2024 janë marrë në hetim 33 ish-zyrtarë të lartë, ndërsa dy prej tyre janë të përfshirë në dy procedime të ndryshme secili. Nga këta, 19 janë dërguar për gjykim dhe për 10 prej tyre është dhënë vendim i formës së prerë.
Në total, gjatë vitit 2024 janë regjistruar 132 hetime të nisura nga kallëzime të qytetarëve dhe institucioneve. Dumani theksoi se kjo tregon rritjen e besimit publik ndaj institucionit të Prokurorisë së Posaçme. /skyweb.al
