Çmimet e qirave në Gjermani kanë vijuar rritjen gjatë tremujorit të dytë të vitit 2026, ndërsa oferta për banesa me qira është tkurrur ndjeshëm në shumë qytete.
Sipas një studimi të Institutit të Ekonomisë në Këln, qiratë e ofruara në treg ishin mesatarisht 4% më të larta se në të njëjtën periudhë të një viti më parë.
Rritja më e fortë u regjistrua në qytetet e mëdha jashtë metropoleve kryesore, ku qiratë u shtrenjtuan me 4.9%.
Në shtatë qytetet më të mëdha të vendit, Berlin, Hamburg, Mynih, Këln, Frankfurt, Shtutgart dhe Dyseldorf, rritja mesatare ishte më e ulët, në 2.9%.
Megjithatë, diferencat mes qyteteve mbeten të mëdha. Në Këln qiratë u rritën me 7.9%, ndërsa në Hamburg me 5.5%.
Rritje shumë më të kufizuara u regjistruan në Shtutgart, me 0.9%, dhe në Berlin, me vetëm 1%.
Ekspertët e lidhin shtrenjtimin me mungesën e banesave të disponueshme në treg. Numri i njoftimeve për qira rezulton rreth 12% më i ulët se në fillim të vitit 2022.
Situata është edhe më e rënduar në disa metropole. Në Hamburg oferta është përgjysmuar, ndërsa në Frankfurt numri i njoftimeve ka rënë me 43%.
Sipas analizës, shumë familje vazhdojnë të qëndrojnë në banesa që nuk u përshtaten më nevojave, pasi nuk duan të humbasin kontratat e vjetra me çmime më të favorshme.
Ndryshe nga tregu i qirave, çmimet e blerjes së banesave janë rritur më ngadalë.
Banesat në pronësi dhe shtëpitë një ose dyfamiljare u shtrenjtuan mesatarisht me 0.8% në nivel kombëtar.
Edhe në këtë treg ka dallime të forta rajonale. Në Dortmund çmimet u rritën me 5%, ndërsa në Mynih ranë me 1.9%.
Të dhënat tregojnë se presioni kryesor në tregun gjerman të banesave po vjen nga qiratë dhe mungesa e ofertës, jo nga një rritje e fortë e çmimeve të shitjes.
