Çmimet e karburanteve kanë arritur pranë niveleve rekord, por të dhënat më të fundit tregojnë se konsumi në Shqipëri nuk është frenuar.
Sipas INSTAT-it, volumi i shitjeve të hidrokarbureve u rrit me 8.4% gjatë tremujorit të dytë të vitit 2026, krahasuar me të njëjtën periudhë të një viti më parë. Karburantet regjistruan rritjen më të lartë ndërmjet të gjitha kategorive të tregtisë me pakicë, duke lënë pas artikujt joushqimorë, me 6.4%, dhe ushqimet, pijet e duhanin, me 6%.
Rritja vijoi edhe në raport me fillimin e vitit. E përshtatur për efektet sezonale, shitja e hidrokarbureve u zgjerua me 2.1% kundrejt tremujorit të parë të 2026-s.
Një element i rëndësishëm është se INSTAT-i mat volumin dhe jo vlerën monetare të shitjeve. Nga treguesi është hequr ndikimi i ndryshimit të çmimeve.
Kjo do të thotë se rritja prej 8.4% nuk vjen thjesht sepse nafta dhe benzina janë shtrenjtuar, por tregon se në pikat e karburanteve është shitur një sasi më e madhe nafte, benzine apo gazi.
Ndërkohë, gjatë ditëve të fundit, nafta është tregtuar me 226-229 lekë për litër, ndërsa benzina me 216-219 lekë për litër, pranë niveleve rekord të regjistruara gjatë krizës së luftës në Ukrainë.
Të dhënat e INSTAT-it i përkasin tremujorit të dytë dhe nuk matin ende ndikimin e rritjes së fortë të çmimeve gjatë shtatorit.
Megjithatë, ato tregojnë se deri në mesin e vitit kërkesa për karburante mbeti e fortë dhe se shtrenjtimi nuk kishte sjellë ulje të volumit të konsumuar. /skyweb.al
