Disa persona duket sikur sulmohen vazhdimisht nga mushkonjat, ndërsa të tjerët qëndrojnë pranë tyre pothuajse të paprekur. Kjo nuk lidhet vetëm me fatin, por me frymëmarrjen, temperaturën e trupit, aromën e lëkurës dhe madje edhe me veshjet.
Në botë njihen rreth 3,500 lloje mushkonjash, por vetëm një pjesë e vogël ushqehet me gjakun e njerëzve. Janë mushkonjat femra ato që pickojnë, pasi kanë nevojë për proteinat e gjakut për zhvillimin e vezëve.
Një nga faktorët kryesorë që i tërheq është dioksidi i karbonit që nxjerrim gjatë frymëmarrjes. Personat që prodhojnë më shumë dioksid karboni, sidomos gjatë aktivitetit fizik, mund të identifikohen më lehtë nga insektet.
Për këtë arsye, mushkonjat mund të tërhiqen më shumë nga gratë shtatzëna, të cilat zakonisht prodhojnë më shumë dioksid karboni dhe kanë temperaturë trupore disi më të lartë.
Edhe aroma individuale luan rol të rëndësishëm. Acidi laktik, djersa dhe bakteret që jetojnë në lëkurë krijojnë një kombinim të veçantë aromash, i cili mund t’i bëjë disa persona më tërheqës për mushkonjat.
Studime të ndryshme sugjerojnë se ndikim mund të kenë edhe faktorët gjenetikë dhe grupi i gjakut, ndërsa personat me grupin O janë identifikuar në disa kërkime si më të ekspozuar ndaj pickimeve.
Edhe ngjyra e veshjeve ka rëndësi. Mushkonjat dallojnë më lehtë ngjyrat e errëta, ndaj veshjet e zeza, blu të errëta ose të kuqe mund ta bëjnë më të lehtë afrimin e tyre.
Për t’u mbrojtur rekomandohet përdorimi i preparateve kundër insekteve, veçanërisht atyre që përmbajnë DEET, si dhe veshja e rrobave të çelëta dhe me mëngë të gjata. Duhet gjithashtu të eliminohet uji i ndenjur, ku mushkonjat shumohen, dhe të vendosen rrjeta në dyer e dritare.
Në rast pickimi, zona nuk duhet kruar, pasi mund të acarohet ose infektohet. Kompresat e ftohta dhe preparatet qetësuese mund të ndihmojnë në uljen e ënjtjes dhe irritimit.
Rritja e temperaturave po zgjeron gjithashtu territorin e mushkonjave, duke i çuar ato edhe në zona ku më parë ishin të rralla. Prania e tyre lidhet jo vetëm me bezdinë e pickimeve, por edhe me rrezikun e transmetimit të sëmundjeve si virusi i Nilit Perëndimor, ethet dengue, Zika dhe malaria.
