Stuhia e fuqishme që përfshiu Tiranën ka shkaktuar vështirësi edhe në transportin ajror. Disa fluturime ndërkombëtare që kishin si destinacion Aeroportin e Rinasit janë detyruar të devijojnë dhe të ulen në aeroporte të tjerë.
Fluturimi i kompanisë Transavia nga Amsterdami në Tiranë është ulur në Brindisi, po ashtu edhe fluturimi Lyon–Tiranë i së njëjtës kompani.
Edhe Ryanair ka pasur vështirësi: fluturimi Paris–Tiranë është ulur në Dubrovnik, njësoj si edhe fluturimi Edinburgh–Tiranë, që u devijua për në të njëjtin aeroport.
Ndërkohë, fluturimi i Wizz Air nga Memmingen në Tiranë është ulur në Bari.
Këto devijime përkojnë me kulmin e stuhisë në kryeqytet. Disa fluturime të tjera u detyruan të qëndronin në ajër për disa minuta, duke pritur përmirësimin e kushteve atmosferike, dhe më pas u ulën në mënyrë të sigurt në Rinas.
Autoritetet bëjnë të ditur se situata është rikthyer në normalitet pas kalimit të stuhisë, ndërsa pasagjerët e prekur nga devijimet janë sistemuar në destinacionet përkatëse./skyweb.al
