Tregtia me pakicë në Shqipëri përshpejtoi rritjen gjatë tremujorit të dytë të vitit 2026, e nxitur kryesisht nga shitjet e karburanteve dhe artikujve joushqimorë.
Sipas INSTAT-it, volumi i përgjithshëm i shitjeve u rrit me 6.8% krahasuar me të njëjtën periudhë të vitit të kaluar, nga 6.7% që ishte rritja vjetore në tremujorin e parë. Kjo është norma më e lartë e rritjes në pesë tremujorët e paraqitur nga INSTAT-i, duke nisur nga tremujori i dytë i vitit 2025.
Volumi i shitjeve të hidrokarbureve shënoi rritjen më të fortë, me 8.4% në terma vjetorë. Kjo ecuri mund të lidhet me shtimin e lëvizjeve, aktivitetin turistik dhe përdorimin më të madh të automjeteve, megjithëse INSTAT-i nuk jep shpjegime mbi faktorët që kanë ndikuar.
Pa përfshirë karburantet, shitjet me pakicë u rritën me 6.3% krahasuar me tremujorin e dytë të vitit 2025.
Artikujt joushqimorë shënuan një rritje vjetore prej 6.4%, ndërsa volumi i shitjeve të ushqimeve, pijeve dhe duhanit u zgjerua me 6%.
Megjithëse karburantet regjistruan normën më të lartë të rritjes, kontributin më të madh në rezultatin e përgjithshëm e dhanë artikujt joushqimorë, me 2.7 pikë përqindjeje.
Hidrokarburet kontribuuan me 2.1 pikë përqindjeje, ndërsa ushqimet, pijet dhe duhani me 2 pikë përqindjeje.
Indeksi i volumit të shitjeve arriti në 125, me vit bazë 2021=100. Kjo do të thotë se gjatë tremujorit të dytë të 2026-s volumi i shitjeve me pakicë ishte rreth 25% mbi nivelin mesatar të vitit 2021.
Rritja vijoi edhe krahasuar me fillimin e vitit. E përshtatur për efektet sezonale, tregtia me pakicë u zgjerua me 1.6% kundrejt tremujorit të parë.
Në këtë krahasim, shitjet e karburanteve u rritën me 2.1% dhe ato të artikujve joushqimorë me 1.9%. Ndërkohë, ushqimet, pijet dhe duhani shënuan një rritje shumë më të kufizuar, prej vetëm 0.4%. /skyweb.al
