Qeveria po i hap rrugë zbatimit të paketës së re fiskale, ku në fokus janë falja e detyrimeve të vjetra dhe marrëveshja e ashtuquajtur e “paqes fiskale” me bizneset.
Ministri i Financave, Petrit Malaj, bëri të ditur se brenda muajit maj do të përfundojnë aktet nënligjore dhe udhëzimet për zbatimin e dy ligjeve kryesore, pas konsultimeve me institucionet ndërkombëtare .
Ligji për fshirjen e detyrimeve parashikon faljen e plotë të borxheve të papaguara në tatime dhe dogana deri më 31 dhjetor 2014. Sipas të dhënave zyrtare, bëhet fjalë për një shumë që arrin rreth 1 miliard euro detyrime të akumuluara ndër vite .
Për detyrimet më të reja, nga viti 2015 deri në 2019, ligji parashikon falje të pjesshme. Tatimpaguesit mund të përfitojnë nëse paguajnë 50% të detyrimit deri më 30 qershor 2026, ndërsa pjesa tjetër fshihet. Një alternativë tjetër është pagesa e 75% të detyrimit deri në fund të vitit 2026, duke përfituar fshirjen e pjesës së mbetur dhe të gjitha gjobave e kamatëvonesave .
Për detyrimet e krijuara nga viti 2020 deri në fund të vitit 2024, parashikohet vetëm fshirja e gjobave dhe interesave, me kusht që të paguhet plotësisht principali deri më 31 dhjetor 2026. E njëjta skemë aplikohet edhe për kontributet e sigurimeve shoqërore dhe shëndetësore .
Paralelisht me këtë ligj, paketa përfshin edhe marrëveshjen e “paqes fiskale”, e cila u mundëson bizneseve të mëdha të hyjnë në një marrëveshje vullnetare me administratën tatimore për parapagimin e tatimfitimit.
Sipas kësaj skeme, bizneset me të ardhura mbi 14 milionë lekë në vit do të parapaguajnë tatimin mbi një bazë të rritur, që llogaritet si fitimi i vitit të kaluar plus një marzh shtesë prej 18%. Nëse fitimi real e tejkalon këtë nivel, mbi diferencën aplikohet një tatim shtesë prej 5% .
Në këmbim, subjektet që hyjnë në këtë marrëveshje përfitojnë moskryerje të kontrolleve tatimore për periudhën e zbatimit, si dhe mundësinë për të rideklaruar pasqyrat financiare të pesë viteve të fundit pa penalitete, duke paguar vetëm 5% tatim për diferencat e deklaruara .
Nga kjo skemë përjashtohen bizneset ndaj të cilave janë hapur çështje penale për mashtrim apo evazion fiskal.
Me këtë paketë, qeveria synon të ulë stokun e borxheve të vjetra, të formalizojë ekonominë dhe të krijojë një marrëdhënie të re bashkëpunimi me biznesin, duke reduktuar konfliktet dhe duke rritur të ardhurat në buxhet. /skyweb.al
