Shqipëria hedh një hap të ri në industrinë e mbrojtjes dhe prodhimit ushtarak, pasi shoqëria shtetërore “Kayo” sh.a ka nënshkruar një marrëveshje bashkëpunimi me kompaninë italiane “Fincantieri”, një nga ndërtuesit më të mëdhenj të anijeve tregtare dhe ushtarake në Evropë.
Marrëveshja synon të hapë rrugën për prodhimin e mjeteve lundruese detare në Shqipëri, fillimisht për nevojat e Forcave të Armatosura dhe më pas për eksport në tregjet ndërkombëtare.
Në ceremoninë e nënshkrimit ishin të pranishëm Kryeministri Edi Rama, Ministri i Mbrojtjes Ermal Nufi, presidenti i “Fincantieri”, Pierroberto Folgiero, si dhe përfaqësues të industrisë.
Kryeministri Rama deklaroi se dy anijet e para që do të ndërtohen do të jenë për ushtrinë shqiptare, duke e çuar në shtatë numrin e anijeve të flotës detare. Sipas tij, më pas prodhimi do të zgjerohet me synimin për eksport, duke u mbështetur në teknologji inovative.
Ai theksoi se projekti nuk ka vetëm dimension ushtarak, por edhe ekonomik dhe arsimor, duke përfshirë të rinjtë e shkollës industriale të Vlorës në këtë proces, si pjesë e formimit profesional dhe zhvillimit të kapaciteteve vendase.
Nga ana tjetër, Ministri i Mbrojtjes Ermal Nufi e cilësoi marrëveshjen si strategjike, duke theksuar se Shqipëria pritet të shndërrohet në një bazë të re europiane të “Fincantieri” për prodhimin e anijeve të vogla dhe të mesme.
Sipas tij, modeli i biznesit parashikon që mbi 90% e klientëve të jenë ndërkombëtarë, duke e pozicionuar “Kayo” si një partner industrial në rrjetin global të kompanisë italiane.
Projekti parashikon ndërtimin e një kantieri të ri në Pashaliman, ku pritet të punësohen rreth 400 persona. Ky investim konsiderohet një hap i rëndësishëm për zhvillimin industrial të vendit, duke krijuar vende pune dhe duke rritur kapacitetet prodhuese dhe teknologjike në Shqipëri. /skyweb.al
