Ministri i Energjisë, Enea Karakaçi, ka reaguar pas vdekjes së elektricistit të OSHEE-së, Bashkim Boçi, i cili humbi jetën teksa punonte për riparimin e një avarie elektrike në zonën e Himarës.
Sipas ministrit, 54-vjeçari ishte angazhuar në rikthimin e furnizimit me energji pas dëmeve të shkaktuara nga moti i keq.
Karakaçi bëri me dije se Boçi ishte pjesë e OSSH Elbasan që prej vitit 2000 dhe e kishte ushtruar detyrën me përkushtim e profesionalizëm deri në momentin e fundit.
“Pas çdo rikthimi të energjisë, është kontributi i njerëzve që punojnë në kushte të rrezikshme, larg familjeve të tyre, për t’u shërbyer qytetarëve. Sot, një prej tyre nuk u kthye më”, shkroi ministri.
Ai tha se punonjësi humbi jetën në krye të detyrës, ndërsa ishte duke riparuar defektet e shkaktuara nga stuhia në Himarë.
Ministri u shprehu ngushëllimet familjarëve, të afërmve dhe kolegëve të viktimës, duke vlerësuar kontributin dhe sakrificën e tij në shërbim të qytetarëve.
“Ndajmë dhimbjen me ta në këtë moment të vështirë dhe nderojmë me mirënjohje kontributin dhe sakrificën e Bashkim Boçit në shërbim të qytetarëve. U prehtë në paqe”, përfundoi Karakaçi.
