Shqipëria pritet të përfshihet të premten nga stuhi të shkurtra, por me intensitet të lartë, të cilat mund të prekin pothuajse të gjithë territorin.
Paralajmërimi është bërë nga meteorologia Tanja Porja, e cila tha se fenomenet më të forta priten në zonat qendrore dhe juglindore të vendit.
Sipas saj, stuhitë do të krijohen në formën e celulave të izoluara, të cilat mund të vendosen mbi një zonë të caktuar dhe të prodhojnë aty reshje shumë të dendura dhe erëra të forta.
Në hartën e rrezikut përfshihen Fushë-Kruja, Tirana, Durrësi, Elbasani, një pjesë e Librazhdit, Pogradeci, Korça, Erseka dhe Devolli.
Me rrezik paraqiten gjithashtu Përmeti dhe Gjirokastra, ndërsa meteorologia thekson se asnjë zonë e vendit nuk mund të konsiderohet plotësisht e përjashtuar.
“Ditën e premte kemi stuhi afatshkurtra thuajse në gjithë territorin shqiptar. Askush s’mund ta përcaktojë, sepse janë celula që shkëputen, vendosen mbi një lokalitet dhe aty prodhojnë maksimumin e aktivitetit të tyre”, deklaroi Porja.
Sipas saj, stuhitë mund të zgjasin rreth 20 deri në 40 minuta, por gjatë kësaj kohe mund të prodhojnë sasi shumë të mëdha reshjesh dhe shpejtësi të larta të erës.
Fenomenet lokale e bëjnë të vështirë përcaktimin e saktë të zonave që do të goditen më fort, ndaj qytetarëve u kërkohet kujdes, veçanërisht gjatë orëve kur pritet zhvillimi i stuhive.
