Aleanca e Profesionistëve të Lirë ka paralajmëruar se do t’i drejtohet Gjykatës Kushtetuese nëse Kuvendi miraton ndryshimet e propozuara në paketën fiskale, që sipas saj kanë efekt prapaveprues dhe bien ndesh me Kushtetutën.
Gjatë diskutimeve në Komisionin për Ekonominë, Punësimin dhe Financat, Lulëzim Alushaj, konsulent bordi pranë Aleancës së Profesionistëve të Lirë, kundërshtoi propozimet që lidhen me tatimin mbi dividendin dhe Tatimin mbi Vlerën e Shtuar.
Sipas tij, të dyja nismat parashikojnë zbatim retroaktiv, duke cenuar parimet kushtetuese dhe sigurinë juridike të bizneseve.
“Sot, në komision, keni dy propozime ligjore, atë për dividendin dhe atë për TVSH-në, që parashikojnë efekt prapaveprues. Sipas nesh, të dyja janë në shkelje të Kushtetutës”, deklaroi Alushaj.
Ai iu referua nenit 155 të Kushtetutës, duke argumentuar se Kuvendi dhe institucionet shtetërore kanë përgjegjësinë të garantojnë që ndryshimet fiskale të mos zbatohen në mënyrë prapavepruese.
Përfaqësuesi i Aleancës kujtoi gjithashtu betejën e mëparshme ligjore për tatimin mbi të ardhurat, duke paralajmëruar se profesionistët e lirë janë të gatshëm të ndjekin sërish të njëjtën rrugë.
“Ne nuk jemi këtu për të bërë politikë, madje qëndrojmë larg saj. Për këtë arsye, ju kërkojmë të reflektoni. Ne jemi të gatshëm që, ashtu siç vepruam me ligjin për tatimin mbi të ardhurat, t’i drejtohemi sërish Gjykatës Kushtetuese”, u shpreh ai.
Përveç kundërshtimit kushtetues, Alushaj ngriti shqetësimin për ndryshimet e vazhdueshme të legjislacionit fiskal, të cilat sipas tij po krijojnë pasiguri për bizneset dhe profesionistët.
Ai argumentoi se ndërmarrjet hartojnë buxhetet dhe planet financiare mbi bazën e një kuadri të caktuar tatimor, por ndryshimet e shpeshta i detyrojnë të rishikojnë kostot dhe përllogaritjet.
“Ne nuk jemi gati, biznesi shqiptar nuk është gati dhe profesionet e lira nuk janë gati të përballen me ndryshime të ligjeve fiskale nga çdo qeveri, çdo dy vjet”, deklaroi Alushaj.
Sipas tij, ligji për tatimin mbi të ardhurat është ndryshuar 48 herë, ndërsa ligji i TVSH-së është rishikuar katër herë, shifra që ai i konsideroi tregues të paqëndrueshmërisë së sistemit fiskal.
Një tjetër problem i ngritur gjatë diskutimeve lidhej me kostot që bizneset përballojnë për shkak të mosmarrëveshjeve me administratën tatimore dhe doganore.
Alushaj deklaroi se një pjesë e madhe e konflikteve në gjykatat administrative lidhen me vendimet e këtyre institucioneve, duke përmendur shkeljen e afateve, gjobat e pajustifikuara dhe mungesën e transparencës.
Sipas tij, bizneset detyrohen të paguajnë shërbime ligjore për të kundërshtuar vendimet e administratës, ndërkohë që rritja e propozuar e TVSH-së në 21% do ta shtonte edhe më shumë këtë kosto.
“Ne, si avokatë, kur të marrim përsipër mbrojtjen e bizneseve në këto çështje, do t’u faturojmë edhe 21% TVSH. Pra, biznesi shqiptar preket dy herë: së pari, nga një shtet që nuk funksionon siç duhet dhe, së dyti, nga kostoja shtesë që do të paguajë për çdo faturë”, tha ai.
Aleanca e Profesionistëve të Lirë i kërkoi Kuvendit të rishikojë propozimet përpara miratimit të paketës fiskale, duke paralajmëruar se në të kundërt do të kërkojë ndërhyrjen e Gjykatës Kushtetuese. /skyweb.al
