Rreth 6 në 10 drejtues të lartë të kompanive të mëdha planifikojnë të rrisin përdorimin e modeleve më të lira të inteligjencës artificiale gjatë vitit të ardhshëm, sipas një studimi të publikuar nga kompania konsulente Capgemini.
Studimi zbulon se 59% e drejtuesve të anketuar kanë shpenzuar për inteligjencën artificiale dukshëm më shumë sesa kishin parashikuar ose buxhetuar, me një tejkalim mesatar prej 24%.
Ndërkohë, 53% e tyre shprehen të shqetësuar për kostot e AI, krahasuar me 45% një vit më parë.
Modelet me peshë të hapur, si ato të zhvilluara nga DeepSeek dhe Mistral, mund të shkarkohen dhe të përdoren në infrastrukturën e vetë kompanive, duke ofruar kosto më të ulëta se modelet komerciale që funksionojnë përmes shërbimeve cloud.
Sipas Capgemini, tokenët e modeleve open-weight kushtojnë mesatarisht 87% më pak se ata të modeleve të mbyllura.
Edhe kompania SAP ka nisur të zëvendësojë disa prej modeleve më të shtrenjta të AI me alternativa më ekonomike, aty ku performanca mbetet e kënaqshme.
Megjithatë, modelet e mbyllura, si ChatGPT, Claude dhe Gemini, pritet të vazhdojnë të përdoren për detyra komplekse, ku kompanitë janë të gatshme të paguajnë më shumë për performancë më të lartë.
Studimi u realizua me 500 drejtues të kompanive me të ardhura vjetore mbi 1 miliard dollarë, në 10 shtete. /skyweb.al
