Punësimi i një personi në Shqipëri i kushton biznesit mesatarisht 98,561 lekë në muaj, por kjo shifër ndryshon ndjeshëm sipas aktivitetit ekonomik dhe madhësisë së ndërmarrjes.
Të dhënat bëhen të ditura nga INSTAT në Anketën e Kostos së Punës. Sipas raportit, kostoja mesatare vjetore për një punonjës me kohë të plotë arrin në 1,182,734 lekë, ndërsa për çdo orë pune përllogaritet në 559 lekë.
Sektori financiar dhe ai i sigurimeve kryesojnë renditjen, me një kosto mesatare prej 1,066 lekësh për orë pune. Në vend të dytë renditen informacioni dhe komunikacioni, me 844 lekë, të ndjekur nga industria nxjerrëse me 836 lekë për orë.
Kosto relativisht të larta regjistrohen edhe në aktivitetet profesionale, shkencore dhe teknike, me 787 lekë për orë, si dhe në arsim, me 756 lekë.
Në anën tjetër të renditjes ndodhen hotelet dhe restorantet, ku kostoja mesatare e punës është vetëm 377 lekë për orë, më e ulëta ndër sektorët e analizuar.
Pas tyre vjen industria përpunuese, me 398 lekë, dhe sektori i furnizimit me ujë dhe menaxhimit të mbetjeve, me 414 lekë. Në ndërtim kostoja është 450 lekë për orë, ndërsa në tregti 486 lekë.
Diferenca ndërmjet sektorit financiar dhe atij të akomodimit e shërbimit ushqimor është 689 lekë për çdo orë pune. Kjo do të thotë se punësimi në financa dhe sigurime ka një kosto mesatare gati 2.8 herë më të lartë se në hoteleri dhe restorante.
Megjithatë, shifrat nuk përfaqësojnë pagat neto që marrin punonjësit. Kostoja e punës përfshin pagat bruto, shpërblimet, kontributet e sigurimeve shoqërore të paguara nga punëdhënësi dhe shpenzime të tjera të lidhura me punësimin.
INSTAT evidenton se 85.5% e kostos totale përbëhet nga pagat dhe shpërblimet, 14.3% nga kontributet e punëdhënësit dhe vetëm 0.2% nga trajnimet profesionale dhe shpenzimet e tjera.
Një tjetër diferencë vërehet sipas madhësisë së ndërmarrjeve. Bizneset me 10 deri në 49 punonjës kanë një kosto mesatare prej 480 lekësh për orë, ndërsa kompanitë me 1,000 ose më shumë të punësuar arrijnë në 685 lekë, ose rreth 43% më shumë.
Në total, INSTAT vlerëson se kostoja vjetore e punës për ndërmarrjet e përfshira në anketë arrin në 468.9 miliardë lekë.
Studimi mbulon ndërmarrjet jobujqësore me të paktën 10 të punësuar, ndërsa nuk përfshin administratën publike, bujqësinë dhe disa aktivitete të tjera. Rezultatet u referohen rreth 397 mijë të punësuar me pagë gjatë vitit 2024. /skyweb.al
