Valët e të nxehtit po rrisin ndjeshëm konsumin e energjisë elektrike në Europë, ndërsa prodhimi nga panelet diellore po kthehet në një nga burimet kryesore për përballimin e kërkesës së shtuar nga kondicionerët.
Sipas një analize të Ember, gjatë ditëve të vapës në qershor dhe korrik, prodhimi nga fotovoltaikët ishte deri në 17% më i lartë se zakonisht në disa vende europiane.
Rritja vjen pikërisht në orët kur konsumi arrin kulmin. Në fund të qershorit, kërkesa ditore për energji u rrit me 28% në Itali, 23% në Hungari, 14% në Francë dhe 13% në Spanjë.
Panelet diellore kanë ndihmuar në mbulimin e një pjese të kësaj kërkese, në një kohë kur temperaturat e larta dhe thatësira po krijojnë probleme për burime të tjera të energjisë.
Nivelet e ulëta të ujit kanë kufizuar prodhimin e hidrocentraleve, ndërsa në disa vende kanë krijuar vështirësi edhe për centralet bërthamore dhe ato me qymyr.
Efekti është ndier edhe në çmime. Gjatë valëve të të nxehtit, çmimet mesatare ditore të energjisë u rritën me 119% në Hungari, 44% në Francë, 13% në Itali dhe 7% në Spanjë.
Por problemi më i madh nis pas perëndimit të diellit. Kondicionerët vazhdojnë të punojnë, ndërsa prodhimi nga fotovoltaikët bie në zero. Në këto orë, sistemi duhet të përdorë burime të tjera, përfshirë centralet me gaz, ku prodhimi është më i shtrenjtë.
Pikërisht për këtë arsye, investimet në bateri për ruajtjen e energjisë po marrin një rëndësi gjithnjë e më të madhe. Energjia e prodhuar nga dielli gjatë ditës mund të ruhet dhe të përdoret në mbrëmje, kur konsumi vazhdon të jetë i lartë.
Edhe Shqipëria po përjeton një rritje të shpejtë të prodhimit nga fotovoltaikët.
Sipas INSTAT, gjatë vitit 2025 kategoria e prodhuesve të tjerë të energjisë, ku përfshihen fotovoltaikët, prodhoi 984 GWh, nga vetëm 507 GWh një vit më parë. Brenda një viti prodhimi u rrit me 94.3%.
Pesha e kësaj energjie arriti në 13.2% të prodhimit neto vendas të energjisë elektrike, nga rreth 6.5% një vit më parë. Në total, Shqipëria prodhoi 7,468 GWh energji gjatë vitit 2025.
Rritja po vazhdon edhe këtë vit. Në tremujorin e parë të 2026-s, prodhimi nga kjo kategori arriti 254 GWh, 44% më shumë se në të njëjtën periudhë të vitit 2025. Pesha në total ishte 7%, më e ulët se mesatarja vjetore e 2025-s për shkak të rritjes së fortë të prodhimit nga hidrocentralet gjatë fillimit të këtij viti.
Kjo është veçanërisht e rëndësishme për Shqipërinë, ku prodhimi i energjisë vazhdon të varet në masë të madhe nga reshjet dhe prurjet në hidrocentrale. Zgjerimi i fotovoltaikëve krijon një burim të dytë të rëndësishëm pikërisht gjatë verës, kur reshjet bien dhe konsumi për ftohje rritet.
Por, ashtu si në pjesën tjetër të Europës, hapi tjetër është ruajtja e energjisë në bateri. Pa të, energjia e bollshme e prodhuar në mesditë nuk mund të përdoret plotësisht në orët e mbrëmjes, kur dielli perëndon por kërkesa për energji mbetet e lartë. /skyweb.al
