Çmimet e apartamenteve në Tiranë janë rritur me ritme të forta gjatë shtatë viteve të fundit, duke u dyfishuar në pjesën më të madhe të njësive administrative të kryeqytetit.
Sipas të dhënave të indeksit Keydata Albania, të publikuara nga “Çelësi Media Group”, rritja nga tremujori i dytë i vitit 2019 deri në qershor 2026 varion nga 85% deri në 151%.
Rritja më e lartë është regjistruar në Njësinë nr. 6, që përfshin Kombinatin, Vaqarin, Yzberishtin dhe Sharrën, ku çmimi mesatar u rrit nga 672 në 1,687 euro për metër katror.
Në Njësinë nr. 4, ku përfshihen Alliasi, Oxhaku, “5 Maji” dhe zona e spitaleve, çmimet u rritën me 130%, duke arritur në 1,759 euro/m².
Rritje prej 128% u regjistrua në Njësinë nr. 7, ndërsa në Njësinë nr. 5, që përfshin edhe ish-Bllokun, çmimi mesatar arriti në 2,514 euro/m².
Vetëm në zonën e ish-Bllokut, çmimi mesatar deri në qershor 2026 arriti në 2,962 euro/m², ose 117% më shumë se shtatë vite më parë.
Njësia nr. 10, ku përfshihen “Myslym Shyri”, Rruga e Durrësit dhe Blloku i Ambasadave, mbetet gjithashtu ndër më të shtrenjtat, me 2,515 euro/m².
Në Njësinë nr. 2, që përfshin zona si Piramida, Pazari i Ri, Bërryli dhe Qyteti Studenti, çmimi mesatar arriti në 2,306 euro/m², me një rritje prej 95%.
Njësitë nr. 1, 3 dhe 9 regjistruan rritje përkatësisht me 115%, 116% dhe 112%, ndërsa çmimet tashmë luhaten nga 1,796 deri në 2,127 euro/m².
Rritja më e ulët është shënuar në Njësinë nr. 8, ku përfshihen Selvia, Medreseja dhe Bregu i Lumit, por edhe aty çmimet janë rritur me 85%, duke arritur në 1,786 euro/m².
Në Njësinë nr. 11, ku përfshihen Lapraka, Zogu i Zi dhe Fushë Mëzezi, çmimet u rritën me 107%, nga 740 në 1,530 euro/m².
Të dhënat tregojnë se shtrenjtimi i apartamenteve nuk është kufizuar vetëm në qendër, por është shtrirë edhe në zonat periferike, ku në disa raste ritmet e rritjes kanë qenë më të larta.
marrë me shkurtime nga Monitor
