Gara mes familjeve më të pasura në botë për të siguruar stafin më të mirë po çon pagat e kuzhinierëve privatë, asistentëve personalë, dadove dhe kujdestarëve të shtëpisë në nivele rekord.
Sipas një studimi të Morgan & Mallet International, një kuzhinier privat mund të fitojë nga 100 mijë deri në 300 mijë dollarë në vit, sidomos nëse ka eksperiencë në restorante Michelin ose është i specializuar në dieta të veçanta.
Kërkesa është rritur pasi familjet shumë të pasura kanë gjithnjë e më shpesh disa rezidenca në vende të ndryshme dhe kërkojnë të njëjtin nivel shërbimi kudo që ndodhen.
Edhe asistentët personalë janë ndër më të kërkuarit. Në SHBA, pagat e tyre mund të arrijnë deri në 250 mijë dollarë në vit.
Detyra e tyre nuk kufizohet më te axhenda dhe telefonatat. Ata organizojnë udhëtime, takime, menaxhojnë prona, personel dhe një pjesë të madhe të jetës së përditshme të punëdhënësit.
Edhe dadot e specializuara po paguhen gjithnjë e më shumë. Ato që flasin disa gjuhë, kanë eksperiencë me fëmijë me nevoja të veçanta dhe janë të gatshme të udhëtojnë vazhdimisht me familjen mund të fitojnë deri në 163 mijë dollarë në vit në Emiratet e Bashkuara Arabe.
Një tjetër profesion që po ndryshon është ai i kujdestarit të shtëpisë. Sot ai nuk merret vetëm me shërbimin në rezidencë, por mund të menaxhojë stafin, sigurinë, sistemet teknologjike dhe funksionimin e disa shtëpive njëkohësisht.
Për këtë arsye, paga e një kujdestari shtëpie mund të arrijë deri në 180 mijë dollarë në vit. Por pagat e larta shoqërohen edhe me kërkesa të forta.
Familjet e pasura kërkojnë konfidencialitet absolut, aftësi teknologjike, fleksibilitet dhe gatishmëri për të udhëtuar në çdo moment.
Në Los Angeles, 77% e asistentëve personalë të punësuar kanë firmosur marrëveshje konfidencialiteti, ndërsa kufizimet për përdorimin e rrjeteve sociale po bëhen gjithnjë e më të zakonshme.
Ndërkohë, stafi privat nuk qëndron më për dekada me të njëjtën familje. Mesatarja ka rënë në rreth tre vjet, pasi punonjësit më të mirë kalojnë te oferta më të larta.
Kështu, në botën e super të pasurve po zhvillohet një treg pune më vete, ku kuzhinierët privatë, dadot, asistentët dhe kujdestarët e shtëpisë po paguhen me paga që deri pak vite më parë do të konsideroheshin të pazakonta për këto profesione. /skyweb.al
