Qeveria shqiptare ka miratuar një vendim të ri për ndryshimin e skemës së subvencioneve nga Fondi i Programit për Bujqësinë dhe Zhvillimin Rural, duke zgjeruar mbështetjen për investime në agroturizëm, akuakulturë, sera, si dhe për mekanizimin dhe modernizimin e fermave bujqësore dhe blegtorale.
Sipas vendimit të fundit, fermerët dhe sipërmarrësit që investojnë në agroturizëm do të përfitojnë deri në 50% të vlerës së faturave tatimore, me një kufi maksimal prej 15 milionë lekësh për subjekt.
Mbështetje e ngjashme financiare do të ofrohet edhe për:
- Investimet në akuakulturë
- Ndërtimin e serave
- Mekanizimin e fermave
- Ndërtimin e ambienteve të reja për kafshë dhe shpendë
- Pajisje dhe sisteme ndihmëse për rritjen e kapaciteteve prodhuese
Një risi e rëndësishme në këtë skemë është edhe pagesa paraprake deri në 30% të mbështetjes financiare, menjëherë pas nënshkrimit të kontratës, për të lehtësuar nisjen e investimeve. Kjo shumë do të disbursohet ndaj përfituesve, me kushtin që ata të paraqesin një garanci pagese nga një shoqëri sigurimi ose bankë.
Për zbatimin e kësaj skeme të re mbështetjeje, qeveria ka programuar një fond total prej 2 miliardë lekësh, duke synuar të nxisë zhvillimin rural dhe rritjen e prodhimit vendas në sektorin agro-ushqimor dhe të turizmit bujqësor./skyweb.al
