Rreth 240 milionë adoleshentë në mbarë botën nuk kanë kryer aktivitet fizik në asnjë ditë të javës gjatë vitit 2025. Të dhënat vijnë nga një studim i ri global, i publikuar në revistën shkencore “The Lancet Global Health”, i cili tregon se nivelet e aktivitetit fizik te të rinjtë kanë mbetur pothuajse të pandryshuara gjatë 15 viteve të fundit.
Sipas studimit, adoleshentët kryejnë mesatarisht 2.7 ditë aktivitet fizik në javë, një shifër e pandryshuar nga viti 2010. Vetëm 14% e tyre, ose një në shtatë, janë fizikisht aktivë çdo ditë.
Studimi përfshiu të dhëna nga 389 anketime, me rreth 3.2 milionë adoleshentë të moshës 11 deri në 17 vjeç, në 140 vende të botës. Studiuesit e konsideruan një ditë aktive atë në të cilën një i ri kryen të paktën 60 minuta aktivitet fizik me intensitet mesatar deri të lartë, sipas rekomandimeve të Organizatës Botërore të Shëndetësisë.
Raporti evidenton gjithashtu dallime të dukshme mes vajzave dhe djemve. Në vitin 2025, djemtë raportuan mesatarisht tri ditë aktivitet fizik në javë, ndërsa vajzat vetëm 2.4 ditë. Për më tepër, aktiviteti fizik te vajzat ka tendencë të bjerë me rritjen e moshës, duke e thelluar edhe më shumë këtë diferencë.
Studimi zbulon edhe pabarazi mes rajoneve të ndryshme të botës. Adoleshentët në Europën Qendrore dhe Lindore, Azinë Qendrore, Azinë Lindore dhe Paqësor, si dhe në vendet me të ardhura të larta të Perëndimit, regjistruan mesatarisht katër ditë aktivitet fizik në javë. Në këto rajone, përqindja e të rinjve që nuk kryejnë fare aktivitet fizik varionte nga 6.9% në 7.7%.
Ndërkohë, në Amerikën Latine dhe Karaibe, Lindjen e Mesme dhe Afrikën e Veriut, Oqeani, Azinë Jugore dhe Juglindore dhe Afrikën Subsahariane, adoleshentët regjistruan mesatarisht vetëm dy ditë aktivitet fizik në javë. Në këto rajone, nga 22.7% deri në 33.1% e tyre nuk kryejnë asnjë aktivitet fizik gjatë javës.
Organizata Botërore e Shëndetësisë synon të ulë me 15% deri në vitin 2030 përqindjen e adoleshentëve që nuk arrijnë të kryejnë të paktën 60 minuta aktivitet fizik në të shtatë ditët e javës. Megjithatë, studimi thekson se aktualisht asnjë vend apo rajon në botë nuk është në rrugën e duhur për të përmbushur këtë objektiv. /skyweb.al
