Në aeroportin e Amsterdamit, një telefonatë në orën 5 të mëngjesit paralajmëron fillimin e ditës për Ben Vos, koordinatori i morgut të Schiphol. Një pasagjer që udhëtonte nga Azia ka ndërruar jetë gjatë fluturimit, dhe detyra e Vos është të sigurojë trajtimin e trupit dhe mbështetjen për të afërmit, shkruan CNN.
Morgu i Schiphol, i hapur që nga viti 1997, është ndër të paktët në Evropë me shërbim të plotë për trajtimin dhe transportin e trupave të udhëtarëve që ndërruan jetë jashtë vendit. Objekti është i madh, rreth 9,700 metra katrorë, dhe ka të gjitha mjetet e nevojshme për kujdesin pas vdekjes: dhoma të ftohta për ruajtjen e trupave, dhoma për pastrimin dhe ritualet fetare, një dhomë për autopsi dhe një sallë pritjeje për familjarët. Trupat transportohen nga avioni drejt morgut përmes një dalje direkte, pa u vënë re nga udhëtarët dhe pa ndërprerje të procedurave të sigurisë.
Çdo vit, morgu trajton rreth 2,500 raste, duke përfshirë qytetarë holandezë që vdesin jashtë vendit dhe të huaj që ndërruan jetë në Holandë dhe kthehen në vendet e tyre. Vos dhe ekipi i tij punojnë ngushtë me autoritetet, linjat ajrore, mjekë, agjenci qeveritare dhe përfaqësi diplomatike për të siguruar dokumentacionin dhe përgatitjen e trupave për transport. Ata kujdesen që çdo hap të kryhet me respekt dhe privatësi, duke ndihmuar familjet të përballojnë humbjen në një moment të vështirë.
Morgu është i përgatitur të respektojë ritualet fetare dhe zakonet e ndryshme. Disa familje, si ato afro-surinameze, organizojnë ceremonia me muzikë, këngë dhe festa që zgjasin disa orë, duke nderuar jetën e të ndjerit. Stafi i morgut bashkëpunon me priftërinj, rabinë, imamë dhe shërbimin e kapelanisë së aeroportit për të ofruar mbështetje dhe udhëzime.
Transporti i trupave jashtë vendit rregullohet nga standarde ndërkombëtare dhe udhëzime të linjave ajrore. Trupat vendosen në arkivole të siguruara dhe paketohen në mënyrë diskrete për transport ajror, duke ruajtur dinjitetin e të ndjerit dhe privatësinë e familjes. Kostoja e shërbimit zakonisht varion nga 5,000 deri në 10,000 euro dhe shpesh mbulohet nga sigurimi i udhëtimit.
Pavarësisht sfidave dhe orareve të pazakonta, për Vos dhe ekipin e tij shpërblimi më i madh është të ndihmojnë familjet në një nga momentet më të vështira të jetës:
“Kur gjithçka kryhet si duhet dhe familja ndjehet e mbështetur, kjo është kënaqësia më e madhe,” thotë ai. / Skyweb.al
