Tradita e pemës së Krishtlindjes filloi në Angli rreth vitit 1800, kur Mbretëresha Charlotte solli pemën e parë të dekoruar në Windsor. Prej atëherë, pema është kthyer në pjesë të pandarë të festave – sot shiten rreth 25–30 milionë pemë të vërteta çdo vit në SHBA dhe rreth pesë milionë në Mbretërinë e Bashkuar. Studimet tregojnë se të rinjtë po i preferojnë gjithnjë e më shumë pemët natyrale, shkruan BBC.
Shpesh diskutohet ndikimi i tyre mjedisor, por ekspertët thonë se çështja është më komplekse sesa duket. Pemët e Krishtlindjes rriten për rreth 10 vjet, dhe plantacionet e tyre mund të mbështesin ekonominë lokale dhe të ruajnë peizazhin rural. Në disa zona bujqësore, ato madje ofrojnë strehë të vlefshme për zogjtë dhe insektet, sidomos krahasuar me kulturat intensive bujqësore.
Megjithatë, këto plantacione shpesh përdorin plehra dhe pesticide, duke krijuar ndikime negative. Studimet tregojnë se plantacionet organike ofrojnë biodiversitet më të lartë dhe rekomandohet ulja e herbicideve.
Një aspekt kyç është mënyra si menaxhohet toka: shumë zona ku sot rriten pemë Krishtlindjeje mund të ishin shndërruar në parkingje apo ndërtime, çka do të ishte shumë më e dëmshme për mjedisin. Sa i përket karbonit, pemët thithin CO₂ gjatë rritjes, por e rikthejnë atë kur digjen ose dekompozohen. Sidoqoftë, sasia totale është e vogël.
Dallimi më i madh qëndron te hedhja pas festave. Një pemë 2 metra që digjet lëshon rreth 3.5 kg CO₂e, ndërsa një pemë në landfill arrin deri në 16 kg CO₂e për shkak të prodhimit të metanit. Prandaj, riciklimi është thelbësor që pema të ketë ndikimin më të ulët.
Edhe pse ndikimi global i pemëve të Krishtlindjes është i vogël, ato shërbejnë si shembull i mirë se si zgjedhjet tona mund të ndikojnë biodiversitetin, klimën dhe përdorimin e tokës—tema që na prekin të gjithëve gjatë gjithë vitit. /Skyweb.al
