Detaje të reja janë zbardhur nga ngjarja e ndodhur mbrëmjen e së dielës në ujërat pranë Palasës, ku dyshohet se është qëlluar me armë zjarri në drejtim të një jahti.
Mjeti lundrues rezulton në pronësi të biznesmenit Bruno Çela, 31 vjeç, djali i Geront Çelës, pronar i kompanisë “Brunes”.
Pas të shtënave, jahti dyshohet se ka tentuar të largohej nga zona dhe të vijonte lundrimin në drejtim të Greqisë. Ai është lokalizuar dhe ndaluar nga Policia rreth dy orë më vonë.
Bruno Çela është shoqëruar në komisariat dhe është marrë në pyetje lidhur me rrethanat e ngjarjes. Në bord ndodheshin gjithashtu Afrim Kastrati, Leandro Haso dhe Pashk Gjini, të cilët po ashtu janë shoqëruar për t’u pyetur.
Gjatë kontrollit të ushtruar në jaht, Policia bëri me dije se nuk janë konstatuar armë apo sende të tjera të paligjshme.
Grupi hetimor po punon për të përcaktuar vendin nga ku është qëlluar, motivin e ngjarjes dhe nëse personat që ndodheshin në jaht kanë qenë objektivi i sulmit.
Bruno Çela rezulton i përfshirë në disa aktivitete biznesi. Përveç lidhjeve me kompaninë “Brunes”, ai figuron aksioner në shoqërinë e mjeteve lundruese “MennYacht Albania”, si edhe në kompanitë “AKBC Invest” dhe “BB Orikum Invest”, të fokusuara në ndërtimin dhe menaxhimin e strukturave turistike.
Ai rezulton gjithashtu i lidhur në biznes me projektin “Vlora Marina”.
Çela është i martuar me vajzën e ish-deputetit Tom Doshi dhe është një emër i njohur në rrethin e sipërmarrjes.
Hetimet për ngjarjen vijojnë, ndërsa autoritetet po verifikojnë lëvizjet e jahtit pas të shtënave, dëshmitë e personave në bord dhe çdo provë që mund të ndihmojë në zbardhjen e plotë të incidentit.
